Hindiston va Nepalda suv toshqinlari: 70 kishi halok bo‘ldi

Hindiston va Nepalda kuchli yog‘ingarchilik oqibatida yuzaga kelgan suv toshqinlari va ko‘chkilar so‘nggi uch kun ichida kamida 70 kishining hayotiga zomin bo‘ldi. Nepalda yana 11 kishi bedarak yo‘qolgan.

Hindistonning eng ko‘p aholiga ega Uttar-Pradesh shtatida 25–27-sentabr kunlari kuchli yog‘ingarchilik kuzatilgan. Shu davrda shtatda 66,5 millimetr yomg‘ir yoqqan, holbuki odatiy ko‘rsatkich 7,6 millimetrni tashkil etadi.

Shtat rasmiylariga ko‘ra, tabiiy ofatlar oqibatida 56 kishi halok bo‘lgan, 46 kishi jarohatlangan. Mingdan ortiq uy zarar ko‘rgan. Kuchli yomg‘ir Bengal qo‘ltig‘ida shakllangan atmosfera jarayonining quruqlik tomon siljishi ortidan kuchaygan.

Hindistonning sharqidagi Odisha shtatida esa daryolardagi suv sathi ko‘tarilishi sabab pasttekisliklarda yashovchi 70 mingdan ortiq aholi xavfsiz hududlarga evakuatsiya qilingan. Mamlakat Markaziy suv komissiyasi yetti shtatdagi 30 ta daryo kuzatuv stansiyasida vaziyatni og‘ir deb baholagan. Ganga, Gandak, Kosi, Bagmati va Narmada kabi yirik daryolarda suv sathi xavfli chegaradan oshgan.

Qo‘shni Nepalda ham kuchli yomg‘ir ortidan suv toshqinlari va ko‘chkilar yuzaga kelgan. Reuters maʼlumotiga ko‘ra, 24-sentyabrdan buyon tabiiy ofatlar oqibatida 14 kishi halok bo‘lgan, yana 11 kishi bedarak yo‘qolgan. Rasmiylar mamlakatdagi 77 tumanning 49 tasida ehtimoliy toshqinlar haqida ogohlantirish bergan.

Nepalning ayrim tog‘li hududlarida elektr taʼminoti ham izdan chiqqan. Rahuganga daryosidagi suv toshqini 40 megavatt quvvatga ega gidroelektr stansiyasining ayrim inshootlari va elektr uzatish liniyalariga zarar yetkazgan.