“Pusan kelishuvi”: AQSH va Xitoy savdo sulhini uzaytirdi
Qaror Donald Tramp va Si Szinpinning Vashingtondagi uchrashuvi arafasida eʼlon qilindi.
AQSH va Xitoy o‘rtasidagi savdo sulhi 2027-yil 10-yanvargacha uzaytirildi. Bu haqda AQSH Moliya vaziri Skott Bessent Fox News telekanaliga bergan intervyusida maʼlum qildi.
Bessentning so‘zlariga ko‘ra, tomonlar 10-noyabrda yakunlanishi kerak bo‘lgan «Pusan kelishuvi» muddatini yana ikki oyga uzaytirishga kelishib olgan. Uning taʼkidlashicha, bu vaqt AQSH va Xitoyga iqtisodiy sohadagi imkoniyatlarni baholash va kengroq kelishuv ustida ishlash imkonini beradi.
«Pusan kelishuvi» 2025-yil oktyabr oyida AQSH prezidenti Donald Tramp va Xitoy raisi Si Szinpinning Janubiy Koreyaning Pusan shahridagi uchrashuvi doirasida erishilgan kelishuvlar asosida shakllangan. U ikki davlat o‘rtasidagi savdo qarama-qarshiligini yumshatish va yangi tarif choralarini joriy etishni vaqtincha to‘xtatishga qaratilgan.
Kelishuv dastlab 2026-yil 10-noyabrgacha amal qilishi kerak edi. Endilikda uning amal qilish muddati 2027-yil 10-yanvargacha uzaytirildi.
Mazkur qaror Xitoy raisi Si Szinpinning AQSHga tashrifi va Donald Tramp bilan muzokaralari fonida qabul qilindi. Tomonlar savdo bilan bir qatorda iqtisodiy munosabatlar va boshqa ikki tomonlama masalalarni ham muhokama qilmoqda.
