Serbiya prezidenti iste’foga chiqdi: Vuchich endi bosh vazirlikka da’vogarlik qiladi

 

Serbiya prezidenti Aleksandr Vuchich 27-sentabr kuni prezidentlik lavozimidan iste’foga chiqdi. U 25-oktabrda bo‘lib o‘tadigan muddatidan oldingi parlament saylovida ishtirok etib, bosh vazir lavozimiga nomzod bo‘lishini ma’lum qilgan.

 

Vuchichning ikkinchi prezidentlik muddati 2027-yil o‘rtalarida yakunlanishi kerak edi. Serbiya Konstitutsiyasiga ko‘ra, bir shaxs prezident lavozimiga ikki martadan ortiq saylanishi mumkin emas. U 2017-yilda prezident etib saylangan va 2022-yilda ikkinchi muddatga qayta saylangan.

 

Reuters xabariga ko‘ra, Vuchichning iste’fosi 25-oktabrga belgilangan muddatidan oldingi parlament saylovlari arafasida yuz berdi. U hukmron Serbiya Progressiv partiyasi (SNS) yangi hukumatni shakllantirgan taqdirda bosh vazir lavozimiga tayinlanishi mumkin. Uning iste’fosi esa navbatdan tashqari prezidentlik saylovlariga yo‘l ochadi.

 

Sentabr oyining boshida Vuchich parlamentni tarqatib yuborish va 25-oktabrda muddatidan oldingi saylov o‘tkazilishini e’lon qilgan edi. Hukmron SNS esa Vuchichni saylovda “Birlashgan Serbiya” ro‘yxatining yetakchisi sifatida ko‘rsatgan.

 

Prezidentlik lavozimi vaqtincha parlament spikeri Ana Brnabichga o‘tadi.

 

Vuchichning iste’fosi Serbiyada davom etayotgan siyosiy noroziliklar fonida yuz bergan. Mamlakatda 2024-yil noyabrida Novi-Sad shahridagi temiryo‘l vokzali tomining qulab tushishi va 16 kishining halok bo‘lishidan keyin talabalar boshchiligidagi namoyishlar boshlangan. Namoyishchilar hukumatdan korrupsiyaga oid masalalar bo‘yicha javobgarlik va siyosiy o‘zgarishlarni talab qilgan. Vuchich esa namoyishchilar bildirgan ayblovlarni rad etib kelgan.