Soxta hujjatlar orqali kredit olish: 5 kishi ushlandi
Ular hujjatlarda o‘zlarini Milliy gvardiyaga qarashli harbiy qism xizmatchilari sifatida ko‘rsatgan.
Bosh prokuratura huzuridagi Departamentning Quva tuman bo‘limi tomonidan tadbirkorlik subyektlarining huquqlarini himoya qilish yuzasidan o‘tkazilgan tergovga qadar tekshiruvda mazkur holat fosh etilgan.
Aniqlanishicha, 5 nafar fuqaro o‘zaro til biriktirib, hech qayerda rasman ishlamagan bo‘lsa-da, go‘yoki Milliy gvardiyaga qarashli harbiy qism xizmatchilari sifatida ko‘rsatilgan soxta mehnat shartnomalari va ish haqi olganliklari to‘g‘risidagi ma’lumotnomalarni tayyorlagan.
Ular ushbu hujjatlarni tijorat bankining Quva tuman filialiga taqdim etib, soxta ma’lumotlar asosida jami 428,8 mln so‘m kredit mablag‘larini olgan.
Mazkur holat yuzasidan Jinoyat kodeksining 168-moddasi (firibgarlik) hamda 228-moddasi (hujjatlar, shtamplar, muhrlar, blankalarni tayyorlash, qalbakilashtirish, sotish yoki ulardan foydalanish) bilan jinoyat ishi qo‘zg‘atilgan.
Hozirda tergov harakatlari olib borilmoqda.
