4 davlat, yangi viza cheklovlari: AQSh kimlarga chora ko‘rdi?

 

AQSh Davlat departamenti G‘arbiy yarimsharda demokratik yo‘l bilan saylangan hukumatlarga korrupsiya yoki narkotik moddalar savdosi orqali putur yetkazishda ayblanayotgan xorijiy fuqarolarga nisbatan yangi viza cheklovlari siyosatini joriy qildi.

 

Yangi mexanizm AQSh Immigratsiya va fuqarolik to‘g‘risidagi qonunining 212(a)(3)(C) bo‘limiga asoslangan. Mazkur norma kirishi yoki AQSh hududidagi faoliyati mamlakat tashqi siyosatiga jiddiy salbiy oqibatlar keltirishi mumkin bo‘lgan xorijiy fuqarolarga nisbatan kirish cheklovlarini qo‘llash imkonini beradi. Siyosat xorijliklarning yaqin oila a’zolariga ham tatbiq etilishi mumkin.

 

AQSh Davlat departamenti yangi mexanizmni doimiy siyosat sifatida ta’riflab, tegishli dalillar paydo bo‘lishi bilan qo‘shimcha viza cheklovlari joriy etilishini bildirdi.

 

Dastlabki choralar Boliviya, Kolumbiya, Ekvador va Peru fuqarolariga nisbatan qo‘llandi. Boliviyada 12 nafar fuqaroning amaldagi vizalari bekor qilingan. Ular orasida sobiq adliya vaziri, sudyalar, prokuror, politsiya polkovnigi va tadbirkor ham bor. Yana 9 nafar Boliviya fuqarosi esa hozirgi vaqtda amaldagi vizaga ega bo‘lmagani sababli kelgusida viza olish imkoniyatidan mahrum etilgan.

 

Kolumbiyada tadbirkor Evklides Torres Romero va senator Marta Peralta Epieyuning vizalari bekor qilindi. Ekvadorda ikki fuqaro, Peruda esa Lima shahridagi Konstitutsiyaviy sud sudyasi va ularning yaqin oila a’zolariga nisbatan ham tegishli cheklovlar joriy etildi.

 

Shuningdek, AQSh Boliviya bosh prokurori va uning yaqin oila a’zolarini alohida tartibda viza cheklovlariga kiritdi. Davlat departamenti uni narkotik moddalar savdosiga ko‘maklashish hamda zo‘ravon jinoyatlar sodir etgan shaxslarning jazodan qochishiga yordam berish uchun pora olishda ayblagan.

 

AQSh Davlat departamenti ushbu choralarni korrupsiya va narkosavdoga qarshi kurashish, shuningdek, mintaqadagi demokratik boshqaruv va qonun ustuvorligini himoya qilish siyosatining bir qismi sifatida izohlagan.

 

Vashingtonning ayrim Lotin Amerikasi davlatlari fuqarolariga nisbatan viza cheklovlari siyosati avval ham qo‘llangan. Masalan, 2025-yilda Kolumbiya rasmiylari va ularning oila a’zolariga nisbatan viza choralaridan foydalanilgan, keyinchalik ayrim boshqa davlatlar vakillariga ham shunday cheklovlar joriy etilgan.