4 yilda 445 ta ish: 14 yoshgacha bo‘lgan bolalarni zo‘rlash holatlari bo‘yicha statistika e’lon qilindi

 

O‘zbekistonda 2022–2025-yillar davomida 14 yoshga to‘lmagan bolalarni zo‘rlash bo‘yicha 445 ta jinoyat ishi qo‘zg‘atilgan.

 

Bu haqdagi ma’lumotni Oliy Majlis Qonunchilik palatasining yalpi majlisida Demokratik institutlar va fuqarolik jamiyatini rivojlantirish masalalari qo‘mitasi raisi Gulrux Agzamova ma’lum qildi.

 

Keltirilgan statistikaga ko‘ra, 2022-yilda 85 ta, 2023-yilda 108 ta, 2024-yilda 129 ta va 2025-yilda 123 ta shunday jinoyat ishi qo‘zg‘atilgan. Eng yuqori ko‘rsatkich 2024-yilda qayd etilgan.

 

Deputat parlamentdagi chiqishida masalaning faqat statistik ko‘rsatkichlar bilan cheklanmasligini ta’kidladi.

 

“Bugun biz shunchaki navbatdagi qonun loyihasidan ko‘proq narsani muhokama qilmoqdamiz. Biz farzandlarimiz taqdiri, ularning xavfsizligi, kelajakka ishonchi va eng muhimi, jamiyatimizda bola qadriyati qay darajada ustuvor ekanligi haqida gaplashmoqdamiz”, — dedi Gulrux Agzamova.

 

Uning ta’kidlashicha, ayrim bolalar qo‘rquv, uyat yoki vaziyatni tushunmaslik sabab yordam so‘rashga qiynaladi.

 

“Ba’zilar qo‘rqishadi, ba’zilar uyalishadi, ba’zilar tushunmaydi va ba’zilar hech kim quloq solmasligiga amin. Ba’zan, hatto biz kattalar ham bolaning yordam so‘rab bergan signallarini o‘z vaqtida anglay olmaymiz. Bolaning sukut saqlashi rozilikni anglatmaydi”, — dedi deputat.

 

Agzamova bolaning o‘zini himoya qila olmasligi jamiyat zimmasidagi mas’uliyatni yanada oshirishini qayd etdi.

 

Shuningdek, u Namangan viloyatida yaqinda yuz bergan voqea bolalarga nisbatan og‘ir jinsiy zo‘ravonlik uchun jinoiy jazolarni kuchaytirish zaruratini yana bir bor ko‘rsatganini ta’kidladi.

 

“Namanganda sodir bo‘lgan dahshatli voqea, menimcha, hech kimni befarq qoldirmadi. Biz, tashabbusni boshlagan deputatlar, bolalarga nisbatan jiddiy jinsiy zo‘ravonlik qilganlar uchun jinoiy jazolarni kuchaytirish zarurligiga yana bir bor aminmiz”, — dedi u.

 

Qonunchilik palatasida ayni yo‘nalishda bolalarga nisbatan zo‘ravonlik va jinsiy tajovuzlar uchun javobgarlikni kuchaytirishga qaratilgan qonun loyihasi ham ko‘rib chiqilmoqda. Loyiha bolalarni zo‘ravonlikdan himoya qilish, jabrlanganlarning huquqlarini kafolatlash hamda tegishli huquqiy mexanizmlarni kuchaytirishga qaratilgan.