5 yilgacha qamoq: ruxsatnomasiz “dom” qurishga jazo kuchaytirildi
Qurishni boshlashdan oldin tegishli hududiy inspeksiyadan ruxsatnoma olish talab etiladi.
Qurilish sohasida davlat nazorati va boshqaruvini takomillashtirishga qaratilgan qonun bilan tegishli qonunchilik hujjatlariga o‘zgartirish va qo‘shimchalar kiritildi.
Unga ko‘ra, qurilish-montaj ishlarini boshlash uchun qurilish va uy-joy kommunal xo‘jaligi sohasida nazorat qilish hududiy inspeksiyalaridan ruxsatnoma olish kerak bo'ladi.
Jinoyat kodeksiga kiritilgan o‘zgartirishlarga ko‘ra, ko‘p kvartirali uylarni tegishli inspeksiyaning ruxsatisiz qurish uchun jinoiy javobgarlik belgilanmoqda.
Xususan, bunday harakat ma’muriy jazo qo‘llanilganidan keyin yana sodir etilsa, 3 yildan 5 yilgacha ozodlikdan mahrum qilish bilan jazolanishi mumkin.
Shuningdek, shaharsozlik to‘g‘risidagi qonunchilikni buzish oqibatida odam o‘lsa yoki boshqa og‘ir oqibatlar yuzaga kelsa, 5 yildan 7 yilgacha ozodlikdan mahrum qilish jazosi belgilandi.
Qonun 2026-yil 28-sentabrda qabul qilingan bo‘lib, rasmiy e’lon qilingan kundan uch oy o‘tib kuchga kiradi.
