“Bolaning xavfsizligi eng asosiy talab”: vazirlik barcha bog‘chalarni tekshirmoqda

Maktabgacha va maktab taʼlimi vaziri Ezoza Karimova Namangan viloyati Uchqo‘rg‘on tumanidagi davlat maktabgacha taʼlim tashkilotida yuz bergan voqea yuzasidan munosabat bildirdi.

Vazirning taʼkidlashicha, holat uni nafaqat vazir, balki ona sifatida ham qattiq larzaga solgan. U voqea haqida xabar topgan kuni Toshkentga qaytish o‘rniga Namanganga borib, vaziyatni joyida o‘rganganini maʼlum qilgan.

Karimovaning qayd etishicha, holat yuzasidan tergov olib borilayotgani sababli uning jarayoniga xalaqit bermaslik, shuningdek, voyaga yetmagan jabrlanuvchining manfaatlari va shaxsiga doir maʼlumotlarni himoya qilish maqsadida tafsilotlar avvalroq keng ommaga oshkor qilinmagan.

Vazirlik maʼlumotiga ko‘ra, voqeaga aloqadorlikda gumon qilinayotgan xodimlar bilan tuzilgan mehnat shartnomalari bekor qilingan. Shuningdek, holatni atroflicha o‘rganish, masʼullarning xizmat vazifalarini qanday bajarganini aniqlash va ularning lavozimiga loyiqligini ko‘rib chiqish uchun maxsus ishchi guruh tuzilgan.

Ezoza Karimova ishchi guruh faoliyati va o‘rganish jarayonlarini shaxsiy nazoratiga olganini bildirdi. Uning so‘zlariga ko‘ra, tekshiruv davomida kim o‘z vazifasini bajarmagani, kim beparvolikka yo‘l qo‘ygani va kim holatga ko‘z yumganiga aniqlik kiritiladi.

Bolalar xavfsizligini taʼminlashga masʼul bo‘lgan har bir xodim va rahbarning faoliyatiga shu mezon asosida baho berilishi, lavozimi yoki xizmat tajribasidan qatʼi nazar, vazirlik vakolati doirasida tegishli choralar ko‘rilishi taʼkidlandi. Aybdor deb topilgan shaxslar qonunchilikda belgilangan tartibda javobgarlikka tortiladi.

Ayni paytda maxsus ishchi guruh mamlakatdagi davlat maktabgacha taʼlim tashkilotlari xodimlarining, jumladan, rahbarlar va texnik xodimlargacha bo‘lgan barcha xodimlarning faoliyatini o‘rganmoqda. Vazirlik aniqlangan kamchiliklarning sabablari va ularga yo‘l qo‘ygan masʼullarning javobgarligi masalasini ham ko‘rib chiqmoqda.

Vazir barcha tizim rahbarlari va xodimlariga murojaat qilib, ularga ishonib topshirilgan har bir bolaning xavfsizligi kundalik faoliyatning eng asosiy talabi bo‘lishi kerakligini taʼkidladi.

“Farzandlarimiz taqdiriga befarq, o‘z vazifasiga masʼuliyatsiz munosabatda bo‘lgan insonlarning taʼlim tizimida ishlashiga yo‘l qo‘yilmaydi”, deya qayd etdi vazir.