Botanika bog‘idagi daraxtlar kesilyaptimi? Fanlar akademiyasi izoh berdi
Toshkent Botanika bog‘idagi daraxt kesish va qazish ishlari haqidagi xabarlar ijtimoiy tarmoqlarda keng tarqaldi.
Ijtimoiy tarmoqlarda Toshkent Botanika bog‘ida daraxtlarni kesish va qazish ishlari olib borilayotgani haqidagi xabarlar tarqaldi. Fanlar akademiyasi Axborot xizmati mazkur holat yuzasidan rasmiy munosabat bildirdi.
Ma’lum qilinishicha, hozirda Toshkent Botanika bog‘ining bufer zonasidagi 50 sotix maydonda suv havzasi tashkil etish ishlari olib borilmoqda.
Fanlar akademiyasining qayd etishicha, mazkur hudud Botanika bog‘ining ilmiy kolleksiya maydonlariga kirmaydi. Ushbu joyda asosan tabiiy ravishda o‘sib chiqqan maymunjon, qamish va boshqa yovvoyi o‘simliklar mavjud.
Suv havzasi tashkil etilayotgan hududda Botanika bog‘ining ilmiy kolleksiyasiga mansub daraxt va butalar mavjud emas.
Ishlar ekologiya mutaxassislari bilan hamkorlikda olib borilmoqda. Hududdagi ishlarning ekologik talablarga muvofiq tashkil etilishi hamda mavjud yashil hududlarga zarar yetkazilmasligi nazorat qilinmoqda.
Rasmiy munosabatga ko‘ra, suv havzasini tashkil etishdan asosiy maqsad Botanika bog‘ida suv o‘tlari, suv bo‘yida o‘suvchi daraxt va butalar ekotizimini yaratish, uni ilmiy jihatdan tadqiq qilish hamda tegishli tavsiyalar ishlab chiqishdan iborat.
Bundan tashqari, mazkur suv havzasi ilmiy vazifalardan tashqari, hududdagi mikroiqlim barqarorligini ta’minlashga ham xizmat qilishi kutilmoqda.
Fanlar akademiyasi ommaviy axborot vositalari va ijtimoiy tarmoq foydalanuvchilaridan faqat ishonchli hamda rasmiy manbalarga tayangan holda xulosa chiqarish, tasdiqlanmagan ma’lumotlarni tarqatmaslikni so‘radi.
