Kesarcha kesish amaliyoti: ayollarning tanlash huquqi belgilandi
Amaliyotdan oldin homilador ayolga mumkin bo‘lgan salbiy oqibatlar tushuntiriladi va uning ixtiyoriy roziligi olinadi.
Adliya vazirligi tug‘ruqni qabul qilishda kesarcha kesish amaliyotini o‘tkazish uchun tibbiy ko‘rsatmalar ro‘yxatini davlat ro‘yxatidan o‘tkazdi.
Unga ko‘ra, davlat va nodavlat tibbiyot tashkilotlarida tug‘ruqni qabul qilishda kesarcha kesish amaliyotini o‘tkazish uchun belgilangan tibbiy ko‘rsatmalar qo‘llaniladi.
Hujjatda kesarcha kesish amaliyoti uchun jami 31 ta tibbiy ko‘rsatma belgilangan. Amaliyot shoshilinch, kechiktirib bo‘lmaydigan, rejalashtirilgan va rejali guruhlarga tasniflanadi.
Shuningdek, tibbiy ko‘rsatmalar mavjud bo‘lmagan taqdirda ham homilador ayol kesarcha kesish amaliyotini o‘tkazishni tanlash huquqiga ega.
Kesarcha kesish amaliyotidan oldin homilador ayolga uning mumkin bo‘lgan salbiy oqibatlari haqida ma’lumot beriladi. Amaliyot esa uning ixtiyoriy roziligi asosida amalga oshiriladi.
