Rossiyada o‘zbekistonlik ishchilarning hujjatlari olib qo‘yildi: ish beruvchiga chora ko‘rildi
Ish beruvchi to‘lanmagan ish haqlarini 48 soat ichida berish majburiyatini oldi.
Rossiyaning “Insiti Logistika” MCHJda mehnat qilayotgan O‘zbekiston fuqarolari hujjatlari olib qo‘yilgani va ish haqlari to‘lanmayotgani yuzasidan Migratsiya agentligining Rossiyadagi vakolatxonasiga murojaat qilgan.
28 sentyabr kuni kelib tushgan murojaat yuzasidan vakolatxona xodimlari korxona manziliga borib, ish beruvchi bilan muzokaralar o‘tkazgan.
Natijada o‘zbekistonlik ishchilarning hujjatlari qaytarilgan. Shuningdek, ish beruvchi to‘lanmagan ish haqlarini 48 soat ichida to‘lab berish majburiyatini olgan.
Migratsiya agentligi mazkur masala vakolatxona nazoratida ekanini maʼlum qildi.
Rossiyada mehnat qilayotgan O‘zbekiston fuqarolari huquq va manfaatlari bilan bog‘liq masalalar yuzasidan Migratsiya agentligining 24/7 koll-markaziga yoki ishonch raqamlari orqali murojaat qilishi mumkin.
