Chipta yo‘q, qarshilik bor: Toshkentlik yo‘lovchi 3 sutkaga qamaldi
Fuqaro avtobusdan tushganidan so‘ng yo‘l haqi to‘langanini tasdiqlovchi hujjatni so‘ragan nazoratchi bilan janjallashib, unga kuch ishlatishga uringan.
Toshkent shahrining Chilonzor tumanida avtobusda yo‘l haqini to‘lamagan va chipta nazoratchisiga qarshilik ko‘rsatgan yo‘lovchiga nisbatan maʼmuriy qamoq jazosi tayinlandi.
Maʼlum qilinishicha, «Toshkent shahar yo‘lovchi tashishni monitoring va nazorat qilish» davlat muassasasi tomonidan avtobuslarda yo‘l haqi to‘lanishini nazorat qilishga qaratilgan reyd tadbirlari olib borilmoqda.
Navbatdagi nazorat tadbiri Chilonzor tumani hududida o‘tkazilgan. Shunda M.M. ismli fuqaro avtobusdan tushganidan so‘ng undan yo‘l haqi to‘langanini tasdiqlovchi hujjatni ko‘rsatish so‘ralgan.
Biroq yo‘lovchi turli vajlarni keltirib, nazoratchining talabini bajarmagan va jamoat joyida tartibsizlik keltirib chiqargan.
Fuqaroning shaxsiga aniqlik kiritish jarayonida u janjal ko‘targan va nazoratchiga kuch ishlatishga uringan. Mazkur holat nazoratchining bodi-kamerasiga yozib olingan.
Holat yuzasidan Jinoyat ishlari bo‘yicha Chilonzor tuman sudida ochiq sud majlisi bo‘lib o‘tgan.
Sud qaroriga ko‘ra, M.M. ga nisbatan 3 sutka maʼmuriy qamoq jazosi tayinlangan.
Masʼul tashkilotning qayd etishicha, yo‘lovchilar avtobusga chiqqanidan so‘ng yo‘l haqini to‘lashi va to‘lovni tasdiqlovchi hujjatga ega bo‘lishi kerak. Shahar ichida va shahar atrofiga qatnaydigan avtobuslarda chiptasiz yurish Maʼmuriy javobgarlik to‘g‘risidagi kodeksning 144-moddasi 5-qismiga muvofiq jarimaga sabab bo‘ladi.
Shuningdek, «Toshkent shahar yo‘lovchi tashishni monitoring va nazorat qilish» davlat muassasasi nazoratchilariga xizmat vazifasini bajarish vaqtida qarshilik ko‘rsatish, ularga nisbatan zo‘ravonlik ishlatish yoki tahdid qilish qonunchilikda belgilangan javobgarlikka sabab bo‘lishi mumkin.
