“O‘qituvchi — mehr daryosi”: Prezident ustozlarni kasb bayrami bilan tabrikladi

Shavkat Mirziyoyev O‘qituvchi va murabbiylar kuni arafasida “Yangi O‘zbekiston” universitetida ustoz va murabbiylar bilan uchrashuv o‘tkazmoqda.

Davlat rahbari mazkur dargoh taʼlim tizimiga yangicha ruh va mazmun olib kirishini taʼkidlab, barcha pedagoglarni kasb bayrami bilan tabrikladi.

— O‘qituvchi — mehr daryosi, o‘qituvchi — ezgulik bulog‘i, o‘qituvchi — maʼrifat quyoshi! Ustozlar bugun yoshlar qalbiga qadayotgan maʼrifat va ezgulik urug‘ining hosilidan ertaga butun jamiyat bahramand bo‘ladi, — dedi Prezident.

Shavkat Mirziyoyev buyuk ajdodlarimiz kamoloti ortida ham ularga saboq bergan muallimlar turganini qayd etdi. Imom Buxoriy, Beruniy, Amir Temur va Alisher Navoiy kabi buyuk siymolarni yetishtirgan ustozlarni “odamiylik bog‘ining bog‘bonlari” deb atadi

Davlat rahbari umrini yoshlar kamolotiga bag‘ishlagan barcha ustoz va murabbiylarga yuksak hurmat va minnatdorlik bildirdi.

Uchrashuvda bugun dunyoda bilim yaratish, axborot tarqatish va mehnat qilish usullari jadal o‘zgarayotgani qayd etildi. Sunʼiy intellekt matn tayyorlashi, dastur yozishi va maʼlumotlarni tahlil qilishi mumkin.

Biroq, Prezident taʼkidlaganidek, hech bir texnologiya bolaning qalbiga ustozdek yo‘l topib, unga Vatanga muhabbat va masʼuliyat tuyg‘usini singdira olmaydi.

Shuningdek, davlat rahbari taʼlim va ilm-fan fidoyilarining bir guruhini davlat mukofotlari bilan taqdirlash to‘g‘risidagi farmonni imzolaganini maʼlum qildi.

Mukofotlanganlar orasida pedagoglar bilan bir qatorda taʼlim rivojiga hissa qo‘shayotgan tadbirkorlar va xorijlik hamkorlar ham bor. Uchrashuv davomida davlat mukofotlari o‘z egalariga topshirildi.

Prezident mukofot sohiblarini tabriklab:

— Ishoning, men ularni ko‘ksingizga taqib, sizlardan ham ko‘proq xursand bo‘lyapman, — dedi.

Shuningdek, taʼlimning barcha bo‘g‘inlaridagi ilg‘or pedagoglarni rag‘batlantirish maqsadida jadid bobomiz Abdulla Avloniy nomidagi alohida davlat mukofotini taʼsis etish taklif qilindi.

Uning ilk sohiblarini kelasi yilgi O‘qituvchi va murabbiylar kuni arafasida eʼlon qilish va taqdirlash ko‘zda tutilmoqda.