Quyosh faolligi kuchaymoqda: Yerda magnit bo‘roni kuzatilishi mumkin
Britaniya geologiya xizmati 2-oktyabr kuni G1 darajasidagi kuchsiz magnit bo‘roni kuzatilishi mumkinligini ma’lum qildi.
Oktyabr oyi boshida Quyoshda yuz bergan plazma otilishi sababli Yerda geomagnit faollik kuchayishi kutilmoqda. Britaniya geologiya xizmati 2-oktyabr kuni G1 darajasidagi kuchsiz magnit bo‘roni kuzatilishi mumkinligini prognoz qilgan.
Ma’lumotlarga ko‘ra, 28-sentyabr kuni Quyoshda sodir bo‘lgan toj massasining otilishi natijasida hosil bo‘lgan plazma buluti 1–2-oktyabr kunlari Yerga yetib kelishi kutilmoqda.
1-oktyabrda geomagnit faollik oshishi, biroq magnit bo‘roni kuzatilmasligi prognoz qilinmoqda. 2-oktyabrda esa faollik eng yuqori darajaga yetib, ayrim vaqt oralig‘ida G1 darajasidagi magnit bo‘roni yuz berishi mumkin.
3-oktyabrga kelib Quyoshdagi otilish oqibatlari asta-sekin susayishi kutilmoqda. Shunga qaramay, geomagnit faollik bir muddat yuqori bo‘lib qolishi mumkin.
Shuningdek, 30-sentyabr kuni Quyoshda C9 sinfidagi chaqnash qayd etilgan. Dastlabki tahlillarga ko‘ra, u bilan bog‘liq plazma buluti Yer orbitasiga sezilarli ta’sir ko‘rsatmasdan o‘tib ketishi mumkin.
