Migrantlar uchun yangi talab: ishga joylashish haqida qachon xabar berish kerak?
Rossiyada patent asosida ishlayotgan migrantlar uchun xabarnoma berish tartibi yangilandi.
Rossiyada 1-oktabrdan patent asosida ishlayotgan xorijiy fuqarolarni ishga qabul qilish bo‘yicha xabarnoma berish tartibi o‘zgardi. Bu haqda Rossiya Ichki ishlar vazirligining Migratsiya xizmati ma’lum qildi.
Yangi tartibga ko‘ra, jismoniy shaxs uchun ishlayotgan xorijiy fuqarolar patentni olganidan keyin ikki oy ichida Rossiya Ichki ishlar vazirligining hududiy organiga ishga joylashgani haqida xabarnoma taqdim etishi kerak.
Agar migrant yuridik shaxsda ishlayotgan bo‘lsa, mehnat shartnomasini tuzish yoki bekor qilish haqidagi xabarnomani ish beruvchi taqdim etadi. Buning uchun uch kunlik muddat belgilangan.
Shuningdek, chet el fuqarosining ishdan bo‘shatilgani haqida Ichki ishlar vazirligini o‘z vaqtida xabardor qilmaslik uchun 800 ming rublgacha jarima yoki 90 kungacha faoliyatni to‘xtatish jazosi qo‘llanishi mumkin.
Avvalgi tartibda patent asosida ishlayotgan migrant va uning ish beruvchisi yoki xizmat ko‘rsatuvchisi xorijiy fuqaroni ishga qabul qilish haqida Ichki ishlar vazirligini xabardor qilishi talab etilgan. Bunda har ikki tomon uchun xabarnoma berish bo‘yicha alohida majburiyat va muddatlar mavjud edi.
Yangi tartibda esa ish beruvchining maqomi — jismoniy yoki yuridik shaxs ekani — xabarnoma berish tartibi va muddatiga ta’sir qiladi.
