O‘quvchilar noroziligi: 2000 kishi hibsga olindi

 

Fransiyada litsey o‘quvchilarining ta’lim sharoitlarini yaxshilash talabi bilan boshlangan norozilik namoyishlari mamlakat bo‘ylab kengayib, ayrim hududlarda politsiya bilan to‘qnashuvlargacha yetib bordi.

 

Noroziliklar avval Parij atrofidagi Il-de-Frans mintaqasida boshlangan. Keyinchalik ular mamlakatning boshqa hududlariga ham tarqalgan. O‘quvchilar gavjum sinflar, o‘qituvchilar yetishmasligi, maktab binolarining ta’mirtalab holati va dars jadvalining haddan tashqari zichligidan norozi ekanini bildirmoqda. Universitet talabalari ham harakatga qo‘shilgan.

 

30-sentabr kuni Fransiya ichki ishlar vaziri Loran Nyunez noroziliklar 356 ta maktabga tarqalganini ma’lum qilgan. Shu kuni 625 kishi hibsga olingan, 83 nafar politsiya va jandarm jarohatlangan. Ta’lim vaziri Eduard Geffray esa noroziliklar boshlanganidan beri 119 nafar o‘quvchi va maktab xodimi jarohatlanganini bildirgan.

 

1-oktabr kuni vaziyat yanada keskinlashgan. Fransiya Ichki ishlar vazirligi ma’lumotiga ko‘ra, shu kunning o‘zida 1 949 kishi hibsga olingan. Harakatlar jami 1 027 ta ta’lim muassasasiga ta’sir ko‘rsatgan, shundan 222 tasi to‘liq bloklangan. Bir kun davomida 305 nafar politsiya va jandarm jarohatlangan.

 

Prezident yoshlarning muammolari va xavotirlarini tushunishini aytgan, biroq zo‘ravonlikni oqlab bo‘lmasligini ta’kidlagan. Hukumat o‘quvchilar o‘z talab va tashvishlarini bildira olishi uchun maslahat platformasini ishga tushirishini ma’lum qilgan.

 

Ta’lim vaziri Eduard Geffray xavfsizlikka tahdid mavjud bo‘lgan yoki kirish yo‘llari to‘silgan maktablarda darslarni vaqtincha masofaviy shaklga o‘tkazishni buyurgan. Hukumat ma’lumotiga ko‘ra, juma kuni 400 dan ortiq ta’lim muassasasini yopish va darslarni masofadan tashkil etish rejalashtirilgan.