Qirg‘iziston kosmosga chiqdi: mamlakatning ilk milliy sun’iy yo‘ldoshi uchirildi
Qirg‘iziston va BAA hamkorligida yaratilgan sun’iy yo‘ldosh ilk bor orbitaga chiqarildi.
Qirg‘izistonning birinchi milliy sun’iy yo‘ldoshi AQShning Kaliforniya shtatidagi Vandenberg harbiy-havo bazasidan SpaceX kompaniyasining Falcon 9 raketasi yordamida orbitaga chiqarildi.
Sun’iy yo‘ldoshning uchirilish marosimida Qirg‘iziston prezidenti Sadir Japarov ham ishtirok etgan. U AQShga ishchi tashrifi doirasida Vandenberg bazasiga borib, tarixiy parvozni kuzatgan.
Qirg‘iziston prezidenti ma’muriyati ma’lumotiga ko‘ra, sun’iy yo‘ldosh bitta raketa yordamida orbitaga chiqarilgan kosmik apparatlar guruhining bir qismi bo‘lgan. Mazkur qurilma Qirg‘iziston va Birlashgan Arab Amirliklari o‘rtasidagi hamkorlik doirasida yaratilgan.
Sun’iy yo‘ldosh Qirg‘izistonda joylashgan Missiyani boshqarish markazi orqali nazorat qilinadi.
Sun’iy yo‘ldoshdan olinadigan ma’lumotlar noqonuniy qazib olish, ruxsatsiz chiqindixonalar va ifloslanish manbalarini aniqlash, shuningdek, logistika yo‘nalishlarini optimallashtirishda ham qo‘llanadi.
Mahalliy manbalarga ko‘ra, Qirg‘izistonning ilk sun’iy yo‘ldoshi qariyb 5 kilogramm og‘irlikdagi kichik kosmik apparat bo‘lib, uni yaratish ustida qariyb 2,5 yil davomida ish olib borilgan.
Sun’iy yo‘ldosh 1-oktabr kuni Falcon 9 raketasining Transporter-18 missiyasi doirasida orbitaga chiqarilgan. Ushbu missiya davomida jami 130 ta foydali yuk past Yer orbitasiga olib chiqilgan.
