Baxtsiz hodisa va og‘ir jarohat: Rossiyadagi vatandosh O‘zbekistonga qaytarildi
Unga parvoz vaqtida ikki nafar o‘zbekistonlik tibbiyot mutaxassisi hamrohlik qilgan.
Rossiyaning Rostov-Don shahrida mehnat faoliyati davomida og‘ir jarohat olgan O‘zbekiston fuqarosi D. U. ni vatanga qaytarishga ko‘maklashildi. Bu haqda “Dunyo” axborot agentligi xabar berdi.
Ma’lum qilinishicha, baxtsiz hodisa oqibatida fuqaro turli tan jarohatlarini olgan va hududdagi tibbiyot muassasalaridan biriga yotqizilgan. U yerda unga zarur tibbiy yordam ko‘rsatilgan.
Shundan so‘ng vatandoshning sog‘lig‘i hamda shifokorlar tavsiyalari inobatga olinib, uni O‘zbekistonga tibbiy evakuatsiya qilish masalasi ishlab chiqilgan.
Fuqaroning xavfsiz tarzda vatanga qaytishini ta’minlash maqsadida O‘zbekistondan ikki nafar tibbiyot mutaxassisi Rossiyaga yuborilgan. Ular parvoz davomida D. U. ning holatini nazorat qilib, zarur tibbiy yordam ko‘rsatib borgan.
Barcha tayyorgarlik ishlari yakunlangach, fuqaro shifokorlar hamrohligida Mineralniye Vodi–Toshkent aviareysi orqali O‘zbekistonga qaytarildi.
