Flydubai’dagi hodisa: Tel-Avivga parvozlar to‘xtatildi

 

Birlashgan Arab Amirliklarining Flydubai aviakompaniyasi 30-sentabr kuni Dubaydan Tel-Avivga uchayotgan FZ1073 reysida yuz bergan xavfsizlik hodisasidan so‘ng Tel-Avivga parvozlarni keyingi xabargacha vaqtincha to‘xtatdi. Bu haqda kompaniya bosh direktori G‘ayt al-G‘ayt ma’lum qildi.

 

Uning so‘zlariga ko‘ra, parvozlarni to‘xtatish vakolatli organlarning iltimosiga binoan amalga oshirilgan. Aviakompaniya jamoalari safar rejalari buzilgan yo‘lovchilarni qo‘llab-quvvatlash va ularni yakuniy manzillariga yetkazish ustida ishlamoqda.

 

30-sentabr kuni Dubaydan Tel-Avivga yo‘l olgan FZ1073 reysi parvoz vaqtida yuz bergan hodisa sabab yo‘nalishini o‘zgartirib, Saudiya Arabistonining Tabuk shahridagi aeroportga xavfsiz qo‘ngan. Flydubai barcha yo‘lovchilar va ekipaj a’zolari xavfsizligini tasdiqlagan.

 

Aviakompaniya bosh direktorining ma’lum qilishicha, reys bortidagi 172 yo‘lovchi va ekipaj a’zolarining barchasi xavfsiz. Hodisada jarohat olgan kapitan esa tibbiy ruxsat olganidan so‘ng BAAga qaytgan.

 

Saudiya Arabistoni Ichki ishlar vazirligi 1-oktabr kuni dastlabki ma’lumotlarni e’lon qilib, hodisa parvoz vaqtida ikkinchi uchuvchi va kapitan o‘rtasidagi mojaro oqibatida yuz berganini bildirgan. Natijada ikki uchuvchi ham turli darajada jarohat olgan.

 

Saudiya rasmiylariga ko‘ra, uchuvchilar sog‘lig‘i yaxshilangach, BAA xavfsizlik kuchlari kuzatuvida Abu-Dabiga olib ketilgan, ekipajning qolgan a’zolari esa avvalroq Dubayga qaytarilgan.

 

Flydubai hodisaning sabab va tafsilotlarini aniqlash bo‘yicha vakolatli organlar tomonidan keng qamrovli rasmiy tergov olib borilayotganini ma’lum qilgan. Aviakompaniya tergovga ko‘maklashmoqda.