Ilk qo‘shma investitsiya: AQSH va Ukraina muhim minerallar bo'yicha kelishuv imzolandi
Yangi loyihalarning umumiy qiymati qariyb 70 mln dollarni tashkil etadi.
AQSh va Ukraina o‘rtasida tuzilgan qo‘shma tiklanish investitsiya jamg‘armasi muhim minerallar sohasidagi ilk loyihasini amalga oshirish bo‘yicha kelishuvga erishdi. Bu haqda Reuters xabar berdi.
AQSh Xalqaro taraqqiyot moliya korporatsiyasi (DFC) investitsiyalar bo‘yicha rahbari Konor Koulmanning ma’lum qilishicha, jamg‘armaning loyihalari umumiy qiymati hozirda qariyb 70 million dollarni tashkil etmoqda.
Minerallar sohasidagi dastlabki loyiha Ukrainadagi BGV Group kompaniyasi bilan qo‘shma investitsiya platformasini yaratishni nazarda tutadi. Mazkur platformaga taxminan 30 million dollar yo‘naltirilishi rejalashtirilgan.
Dastlabki bosqichda Ukraina hududidagi erta bosqichdagi konchilik loyihalari, jumladan noyob yer elementlari, uran, berilliy va tsirkoniy konlarini o‘rganish va o‘zlashtirishga e’tibor qaratiladi.
Jamg‘arma minerallar bilan bir qatorda Ukrainaning energetika infratuzilmasini mustahkamlashga qaratilgan loyihalarni ham moliyalashtirishni rejalashtirgan.
AQSh-Ukraina qo‘shma jamg‘armasi 2025-yilda ikki davlat o‘rtasida imzolangan minerallar kelishuvi asosida tashkil etilgan. 2026-yil 2-oktyabr kuni AQSh G‘aznachiligi jamg‘arma tomonidan muhim minerallar va energetika sohalarida yangi investitsiyalar ma’qullanganini rasman e’lon qildi.
Jamg‘arma kelgusida investitsiya imkoniyatlarini kengaytirish uchun qo‘shimcha kapital jalb qilishni ham rejalashtirmoqda.
