Irkutskdagi kasallik gumoni: O‘zbekistonda epidemiologik nazorat kuchaytirildi
Rossiyaning Irkutsk viloyatida o‘ta xavfli yuqumli kasallikka gumon qilingan holat bo‘yicha vaziyat kuzatilmoqda.
Ijtimoiy tarmoqlar va ayrim axborot manbalarida Rossiyaning Irkutsk viloyatida o‘ta xavfli yuqumli kasallikka gumon qilingan holat qayd etilgani haqida xabarlar tarqalmoqda.
Sanitariya-epidemiologiya qo‘mitasi ma’lum qilishicha, hozirda Rossiyaning vakolatli idoralari hamda Jahon sog‘liqni saqlash tashkilotining rasmiy manbalari orqali vaziyat muntazam kuzatib borilmoqda.
Xususan, kasallik tashxisining laboratoriya tekshiruvlari orqali tasdiqlangan yoki tasdiqlanmagani, ehtimoliy yuqish manbai va yo‘llari, bemorning harakatlanish yo‘nalishi hamda u bilan muloqotda bo‘lgan shaxslar haqidagi ma’lumotlar o‘rganilmoqda.
Ayni vaqtda O‘zbekiston hududiga o‘ta xavfli yuqumli kasalliklarning kirib kelishi va tarqalishining oldini olish bo‘yicha tegishli xizmatlarning tayyorgarligi kuchaytirilgan.
Qo‘mita fuqarolardan ijtimoiy tarmoqlarda tarqalayotgan turli xabarlarga ishonmaslik va vaziyat haqidagi ma’lumotlarni faqat rasmiy manbalar orqali kuzatib borishni so‘radi.
Epidemiologik vaziyatda o‘zgarish yuz bergan taqdirda jamoatchilikka belgilangan tartibda qo‘shimcha axborot taqdim etiladi.
