Kredit olishdan oldin ogohlantirish: banklar uchun yangi talablar belgilandi

 

O‘zbekistonda banklar mijozlarni kredit olish bilan bog‘liq xavflar va qarzni o‘z vaqtida to‘lamaslik oqibatlari haqida oldindan ogohlantirishi shart bo‘ladi. Bu haqda Markaziy bank matbuot xizmati xabar berdi.

 

Markaziy bank boshqaruvining tegishli qarori 2026-yil 30-sentabr kuni Adliya vazirligida 3948-son bilan davlat ro‘yxatidan o‘tkazilgan. Hujjat rasmiy e’lon qilingan kundan e’tiboran bir oy o‘tgach kuchga kiradi.

 

Yangi tartibga ko‘ra, banklarning kredit mahsulotlari reklamalarida qarzni o‘z vaqtida to‘lamaslik xavfli ekani haqida ogohlantirish bo‘lishi kerak.

 

Bunda ogohlantirish:

• rasm, video yoki audio ko‘rinishidagi reklamaning kamida 10 foizini egallashi;

• kredit shartnomasining birinchi sahifasida kamida 30 foiz maydonni egallashi;

• qarzni o‘z vaqtida to‘lamaslik natijasida yuzaga kelishi mumkin bo‘lgan oqibatlarni ko‘rsatishi kerak.

 

Jumladan, ogohlantirishda qarzdorlikning oshib borishi, qarz oluvchining mol-mulki va bank hisobvaraqlaridagi mablag‘lariga undiruv qaratilishi hamda kredit tarixiga salbiy ta’sir ko‘rsatishi mumkinligi haqida ma’lumot beriladi.

 

Shuningdek, mijozlarni chalg‘ituvchi kredit mahsulotlarini reklama qilgan banklarga nisbatan tegishli chora va sanksiyalar qo‘llanadi.

 

Markaziy bankning qayd etishicha, mazkur o‘zgartirishlar fuqarolarning kredit olishdan oldin uning shartlari, xatarlari va qarzni o‘z vaqtida to‘lamaslik oqibatlari haqida aniq va tushunarli ma’lumotga ega bo‘lishini ta’minlashga qaratilgan.

 

Bu orqali fuqarolarning o‘z moliyaviy imkoniyatlarini baholab, oʻylab qaror qabul qilishiga, ortiqcha qarz yukining oldini olish va banklarning kredit mahsulotlari hamda reklamasida ochiqlikni ta’minlash ko‘zda tutilgan.