Mahkumlarni vataniga o‘tkazish: O‘zbekiston va Pokiston o‘rtasidagi bitim ratifikatsiya qilinadi
Bitimga ko‘ra, ozodlikdan mahrum qilish jazosini o‘tayotgan mahkumlar jazoning qolgan qismini fuqarosi bo‘lgan davlatda o‘tashi uchun o‘tkazilishi mumkin.
Senatning yigirmanchi yalpi majlisida 2026-yil 5-fevral kuni Islomobod shahrida imzolangan “O‘zbekiston Respublikasi va Pokiston Islom Respublikasi o‘rtasida mahkumlarni o‘tkazish to‘g‘risidagi shartnomani ratifikatsiya qilish to‘g‘risida”gi qonun muhokama qilindi.
Shartnomaga ko‘ra, tomonlar ozodlikdan mahrum qilish jazosini o‘tayotgan mahkumlarni jazoning qolgan qismini ular fuqarosi bo‘lgan davlatda o‘tashi uchun o‘tkazish bo‘yicha hamkorlik qiladi.
Hujjatda mahkumni o‘tkazish shartlari va bunday so‘rovni rad etish asoslari, vakolatli markaziy organlar, so‘rov shakli va mazmuni, hukmni ijro etish tartibi, tranzit hamda xarajatlarni qoplash masalalari belgilangan.
Senatorlar ushbu qonunning qabul qilinishi chet elda jazo o‘tayotgan O‘zbekiston fuqarolarining huquq va qonuniy manfaatlarini himoya qilish imkoniyatlarini kengaytirishini ta’kidladi.
Shuningdek, mazkur tartib mahkumlarning ijtimoiy reabilitatsiyasiga ko‘maklashishi, ikki davlat o‘rtasidagi huquqiy hamkorlikni rivojlantirishi va jazoni ijro etish sohasidagi xalqaro hamkorlikni mustahkamlashi qayd etildi.
Muhokamalar yakunida qonun senatorlar tomonidan ma’qullandi.
