Maxfiy uchrashuv: Tramp ma’muriyati Eron masalasini muhokama qildi

 

AQSh prezidenti Donald Tramp ma’muriyatining yuqori lavozimli amaldorlari Kemp-Devidda Eron bilan bog‘liq mojaroning keyingi bosqichlari hamda Yamandagi vaziyatni muhokama qilish uchun bir necha soat davom etgan yopiq uchrashuv o‘tkazdi. Bu haqda Axios uch nafar amerikalik amaldorga tayanib xabar berdi.

 

Uchrashuv AQSh ma’muriyati tomonidan rasman e’lon qilinmagan. Axios manbalariga ko‘ra, yig‘ilishga AQSh vitse-prezidenti J. D. Vens raislik qilgan.

 

Unda Davlat kotibi Marko Rubio, Mudofaa vaziri Pit Xegset, Oq uyning maxsus vakili Stiv Uitkoff, Markaziy razvedka boshqarmasi direktori Jon Ratkliff hamda AQSh Qurolli kuchlari shtab boshliqlari qo‘mitasi raisi general Den Keyn ishtirok etgan.

 

Uchrashuvda Eron bilan bog‘liq vaziyatning keyingi rivoji va Saudiya Arabistoni bilan Yamandagi hutiylar o‘rtasidagi qarama-qarshilik muhokama qilingan. Axios suhbatdoshlaridan biri ma’muriyatning Yaqin Sharqdagi vaziyat bo‘yicha muzokaralari yuzasidan ayrim qarorlar qabul qilingan yoki muhim masalalar chuqur muhokama qilinganini bildirgan.

 

Axios qayd etishicha, bunday formatdagi avvalgi uchrashuv 2025-yil iyun oyida, Isroilning Eronga qarshi harbiy operatsiyasi boshlanishidan bir necha kun oldin o‘tkazilgan.

 

Shuningdek, Saudiya Arabistoni Yamandagi hutiylarga qarshi rejalashtirilayotgan harbiy amaliyotda AQShning ishtirok etishini so‘ramoqda. Xususan, Riyoz Vashingtondan hutiylar pozitsiyalariga havo zarbalari berishda yordam kutayotgani aytilmoqda.

 

Axios ma’lumotlariga ko‘ra, Tramp hozircha hutiylarga qarshi havo hujumlarida ishtirok etishga ehtiyotkorlik bilan yondashmoqda. Biroq AQSh rasmiylari prezidentning pozitsiyasi keyinchalik o‘zgarishi mumkinligini bildirgan. Saudiya Arabistoni esa hutiylarga qarshi keng ko‘lamli amaliyotga tayyorgarlik ko‘rayotgani haqida Reuters ham xabar bergan.