Qalbaki pullar va “bosmaxona”: Namanganda 51,5 mln so‘mlik qalbaki pullar aniqlandi
Pullar tayyorlab sotganlikda gumonlangan ikki shaxs ushlangan.
Namangan shahrida qalbaki banknotlarni tayyorlab, sotish bilan bog‘liq holat fosh etildi. Bu haqda Davlat xavfsizlik xizmatining Jizzax va Namangan viloyatlari bo‘yicha boshqarmalari hamda Bojxona organlari hamkorligida o‘tkazilgan tezkor tadbirda ma’lum bo‘ldi.
Tadbir davomida Pop tumanida yashovchi, 1989-yilda tug‘ilgan va Izboskan tumanida istiqomat qiluvchi, 1999-yilda tug‘ilgan ikki nafar shaxs qalbaki 20 ming, 50 ming, 100 ming va 200 ming so‘mlik banknotlarni tayyorlab, sotgani aniqlangan.
Ular jami 37,4 mln so‘mlik qalbaki pullarni 7,5 mln so‘mga shartli xaridorga sotayotgan vaqtida ashyoviy dalillar bilan ushlangan.
Shuningdek, shaxsiy tintuv hamda ulardan birining boshqaruvida bo‘lgan “Lasetti” rusumli avtomobil salonini ko‘zdan kechirish davomida yana 6,4 mln so‘mlik qalbaki pullar aniqlangan.
Tezkor tadbir davom ettirilib, Izboskan tumanida yashovchi fuqaroning xonadoni ko‘zdan kechirilgan. U yerdan yana 7,7 mln so‘mlik qalbaki pullar, turli nominaldagi kupyuralar tasviri tushirilgan 145 dona oq qog‘oz, shuningdek, kompyuter, rangli printer va boshqa ashyolar protsessual tartibda rasmiylashtirib olingan.
Shu tariqa, tezkor tadbirlar davomida jami 51,5 mln so‘mlik qalbaki pullar aniqlangan.
Holat yuzasidan mazkur shaxslarga nisbatan jinoyat ishi qo‘zg‘atilgan. Hozirda tergov harakatlari olib borilib, ularning ehtimoliy boshqa jinoiy aloqalarini aniqlash bo‘yicha choralar ko‘rilmoqda.
