“Umra” evaziga 4800 dollar: noqonuniy xizmat ko‘rsatishga urinish fosh etildi
Ziyoratni tashkil etishga vakolati bo‘lmagan shaxs 4 nafar fuqaroni Saudiya Arabistoniga yuborishni va’da qilib, pul talab qilgan.
Samarqand shahrida “Umra” ziyoratini tashkil etishga vakolati bo‘lmagan shaxsning fuqarolarni Saudiya Arabistoniga yuborishni va’da qilib, pul talab qilgani aniqlandi.
Ma’lum qilinishicha, 1956-yilda tug‘ilgan, Samarqand shahrida yashovchi va muqaddam firibgarlik bilan bog‘liq jinoyat uchun sudlangan shaxs Oqdaryo tumanida istiqomat qiluvchi 4 nafar fuqaroni “Umra” ziyoratiga yuborishni va’da qilgan.
Buning evaziga u fuqarolardan 4800 AQSH dollari talab qilgan.
Davlat xavfsizlik xizmati Samarqand viloyati boshqarmasi hamda viloyat Ichki ishlar boshqarmasi xodimlari hamkorligida o‘tkazilgan tezkor tadbir davomida mazkur shaxs oldindan 3000 AQSH dollarini olayotgan vaqtida ashyoviy dalillar bilan ushlangan.
Holat yuzasidan unga nisbatan jinoyat ishi qo‘zg‘atilgan. Hozirda tergov harakatlari olib borilmoqda.
