14 harbiyning o‘limi: Qozog‘iston harbiy-dengiz kuchlari sobiq bosh qo‘mondoni hibsga olindi

 

Qozog‘iston Harbiy-dengiz kuchlarining sobiq bosh qo‘mondoni Kaspiy dengizidagi harbiy mashg‘ulotlarda 14 nafar harbiy xizmatchi halok bo‘lishi yuzasidan hibsga olindi.

 

Qozog‘iston Ichki ishlar vazirligi ma’lumotiga ko‘ra, harbiy tergov bo‘limi Kaspiy dengizidagi mashg‘ulotlar vaqtida harbiy xizmatchilarning halok bo‘lishi bo‘yicha jinoyat ishi doirasida sobiq bosh qo‘mondonni xizmatga beparvolikda gumon qilib hibsga olgan. U vaqtincha saqlash izolyatoriga joylashtirilgan, keyinchalik sud qarori bilan qamoqqa olingan.

 

Qozog‘iston OAVlari hibsga olingan harbiy sobiq Harbiy-dengiz kuchlari bosh qo‘mondoni Kanat Niyazbekov ekanini xabar qilgan. U 3-oktabr kuni lavozimidan ozod etilgan edi.

 

Fojia 24-sentabr kuni Mang‘istov viloyatida “Xazar Qorg‘ani-2026” harbiy mashg‘ulotlari vaqtida yuz bergan. “Kaysar” kemasidan harbiy xizmatchilarni tushirish jarayonida 17 nafar harbiyni dengiz oqimi olib ketgan. Ulardan uch nafari qutqarilgan, 14 nafari halok bo‘lgan.

 

Mazkur hodisadan so‘ng Mudofaa vazirligi tizimining besh nafar mansabdori, jumladan, Harbiy-dengiz kuchlari bosh qo‘mondonining birinchi o‘rinbosari, ikki harbiy qism komandiri, dengiz piyodalari rotasi va kater komandirlari ham hibsga olingan. Ular xizmatga beparvolik hamda og‘ir oqibatlarga olib kelgan kemachilik qoidalarini buzishda gumon qilinmoqda.

 

Shuningdek, Qozog‘iston Mudofaa vazirligida o‘tkazilgan kompleks tekshiruv davomida mashg‘ulotlarni tayyorlash va rejalashtirishda jiddiy kamchiliklar aniqlangani ma’lum qilingan. Tergov va tekshiruv ishlari davom etmoqda.