Endi quruqlik orqali ham borish mumkin: Tojikiston va Eron o‘rtasida to‘liq vizasiz rejim kuchga kirdi
Vizasiz qatnov faqat havo yo‘llariga emas, quruqlikdagi xalqaro chegara o‘tish punktlariga ham tatbiq etiladi.
2026-yil 5-oktabrdan Tojikiston va Eron o‘rtasida umumiy fuqarolik pasporti egalari uchun vizasiz rejim to‘liq kuchga kirdi.
Tojikiston Tashqi ishlar vazirligi ma’lumotlariga ko‘ra, amaldagi umumiy fuqarolik pasportiga ega bo‘lgan ikki mamlakat fuqarolari 90 kunlik muddat ichida 30 kungacha boshqa davlat hududiga vizasiz kirishi, tranzit o‘tishi yoki vaqtincha qolishi mumkin.
Yangi tartib xalqaro chegara o‘tish punktlariga, jumladan, quruqlikdagi chegara punktlari va xalqaro aeroportlarga nisbatan qo‘llaniladi. Shuningdek, uchinchi mamlakatlardan havo yo‘llari orqali kelib chegarani kesib o‘tishda ham ushbu tartibdan foydalanish mumkin.
Bunda fuqarolar ikki davlatning chegarani kesib o‘tish va mamlakat hududida bo‘lish bo‘yicha milliy qonunchiligi talablariga rioya qilishi lozim.
Tojikiston va Eron o‘rtasidagi vizasiz rejim dastlab 2024-yil 10-avgustda joriy etilgan. O‘sha paytda tartib faqat Dushanbe–Tehron va Tehron–Dushanbe yo‘nalishlaridagi havo qatnovlariga tatbiq etilgan.
Endilikda esa vizasiz rejim quruqlikdagi xalqaro chegara o‘tish punktlarini ham qamrab oladi. Bu ikki mamlakat fuqarolarining o‘zaro safarlarini yanada yengillashtiradi.
