Saudiya Arabistonida turk harbiylari: Turkiya Saudiya Arabistonida harbiy baza ochishi mumkin
Anqara to‘rtta muhim gaz va elektr energiyasi inshootini havo mudofaasi tizimlari yordamida himoya qilishda ishtirok etadi.
Turkiya Makka mudofaa shartnomasi doirasida Saudiya Arabistonidagi harbiy ishtirokini kengaytirishi va qirollik hududida harbiy baza joylashtirishi mumkin. Bu haqda Turkiyaning «Türkiye Gazetesi» nashri xabar berdi.
Nashr maʼlumotlariga ko‘ra, Anqara Saudiya Arabistonidagi to‘rtta muhim gaz va elektr energiyasi inshootini qisqa va o‘rta masofali havo mudofaasi tizimlari yordamida himoya qilishda ishtirok etadi.
Avvalroq Turkiyaning Saudiya Arabistoniga cheklangan harbiy kontingent va texnika yuborishi mumkinligi haqida xabarlar tarqalgan edi. Rejaga ko‘ra, mamlakatga 200 dan ortiq harbiy mutaxassis, texnik guruhlar, havo mudofaasi va elektron urush vositalari joylashtirilishi mumkin.
5-oktyabr kuni Ar-Riyodda Makka mudofaa ittifoqiga aʼzo Turkiya, Saudiya Arabistoni va Pokiston vakillari qo‘shma mudofaa majburiyatlarini amalga oshirish hamda harbiy kuchlarni joylashtirish masalalarini muhokama qilgan.
Shundan kelib chiqib, Turkiya Saudiya Arabistonining to‘rtta muhim gaz va elektr energiyasi obyektini o‘zining qisqa va o‘rta masofali havo mudofaasi tizimlari bilan himoya qilishda ishtirok etishi kutilmoqda. Saudiya Arabistoniga yuboriladigan turk harbiylari soni yaqin kunlarda aniqlanishi aytilgan.
Turk harbiy kontingentini Saudiya Arabistoniga yuborish bo‘yicha yakuniy qaror Saudiya Arabistoni parlamenti tomonidan maʼqullanishi kerak. Ushbu masalaning oktyabr oyida ko‘rib chiqilishi kutilmoqda.
Ochiq manbalarga ko‘ra, Turkiyaning bir qator mamlakatlarda harbiy bazalari va harbiy obyektlari mavjud. Jumladan, turk harbiylari Qatar, Iroq, Suriya, Somali va Liviyada ham joylashtirilgan.
