Fransiyadagi namoyishlar hukumatni harakatga keltirdi: maktablarga qo‘shimcha o‘qituvchilar yuboriladi
Fransiya ta’lim vaziri litseylarda ishda bo‘lmagan o‘qituvchilar o‘rnini bosish bo‘yicha «favqulodda reja»ni taqdim etdi.
Fransiyada maktab o‘quvchilarining ommaviy norozilik namoyishlari ortidan hukumat o‘qituvchilar yetishmovchiligini bartaraf etish uchun favqulodda reja e’lon qildi. Unga ko‘ra, o‘qituvchilar o‘rnini bosish uchun qo‘shimcha 3 ming nafar pedagog jalb etiladi.
Fransiya ta’lim vaziri Eduar Jefre litseylarda ishda bo‘lmagan o‘qituvchilar o‘rnini bosish bo‘yicha «favqulodda reja»ni taqdim etdi. Shuningdek, vazir rektoratlarga 2026-yilgi budjetda nazarda tutilganidan ko‘proq o‘qituvchini shartnoma asosida ishga olishga ruxsat beradi.
Fransiya ta’lim tizimida o‘quv yili davomida o‘qituvchilar o‘rnini bosuvchi qariyb 21 ming nafar o‘rta maktab pedagogi faoliyat yuritadi. Ularning taxminan 10 ming nafari shtat asosida, qolganlari esa shartnoma asosida ishlaydi.
Hukumatning bu qarori yuqori sinf o‘quvchilarining talablaridan biriga javob bo‘ldi. Biroq kasaba uyushmalari qo‘shimcha o‘qituvchilarni jalb etish tashabbusini ta’lim tizimidagi kadrlar yetishmovchiligining tizimli yechimi bo‘lmagan «shoshilinch chora» deb baholadi.
Ma’lumotlarga ko‘ra, 8-oktyabr kuni Fransiya bo‘ylab davom etgan o‘quvchilar namoyishlari vaqtida 504 kishi hibsga olingan, 48 nafar huquq-tartibot xodimi jarohatlangan. Eng yirik tartibsizliklar Parijdagi Bastiliya maydonida yuz bergan. Payshanba kuni mamlakat bo‘ylab namoyishlarda 70 mingdan ortiq kishi qatnashgan.
7-oktyabr kuni Fransiya bosh vaziri Sebastyan Lekornyu hukumati oy oxirigacha o‘quvchilar noroziliklarida bildirilgan shikoyatlarni inobatga olishga qaratilgan choralarni e’lon qilishini bildirgan edi.
So‘rovnoma natijalariga ko‘ra, fransuzlarning aksariyati yuqori sinf o‘quvchilarining noroziliklarini qo‘llab-quvvatlaydi, biroq namoyishlar to‘xtatilishini ham istaydi.
