Davlat to‘ntarishiga urinish ayblovi: sobiq prezidentning o‘g‘li 4 yilga qamaldi

Qirg‘izistonning sobiq prezidenti Almazbek Atambayevning o‘g‘li Qodirbek Atambayev davlat hokimiyatini zo‘rlik bilan egallashga urinish ishi bo‘yicha 4 yilga ozodlikdan mahrum qilindi. Sud uning mol-mulkini musodara qilish haqida ham qaror chiqardi. Bu haqda AKIpress xabar berdi.

Bishkek shahrining Pervomay tuman sudi 8-oktyabr kuni mazkur ish bo‘yicha hukmni eʼlon qildi. Qodirbek Atambayev va Sotsial-demokratlar partiyasi yetakchisi Temirlan Sultanbekov hokimiyatni zo‘rlik bilan egallashga urinishda aybdor deb topildi.

Sultanbekov ham mazkur ish doirasida 4 yilga ozodlikdan mahrum etildi. Biroq uning 2025-yilda ovozlarni sotib olish ishi bo‘yicha avval tayinlangan jazosining o‘talmagan qismi ham hisobga olinib, yakuniy qamoq muddati 7 yil etib belgilandi. Uning ham mol-mulki musodara qilinadi.

2025-yil noyabr oyining oxirida Qirg‘iziston huquq-tartibot organlari ommaviy tartibsizliklarni rejalashtirishda gumon qilib, 10 kishini hibsga olgan. Ular orasida Qodirbek Atambayev, Temirlan Sultanbekov, sobiq deputatlar Shaylubek Atazov va Kubanichbek Qodirov, shuningdek, sobiq prezidentning sobiq tan qo‘riqchisi Damir Musakeyev ham bo‘lgan.

Tergov maʼlumotlariga ko‘ra, gumonlanuvchilar navbatdan tashqari parlament saylovlaridan keyin mamlakatning janubidan boshlab ommaviy norozilik namoyishlarini tashkil etishni rejalashtirgan. Dastlab ularga ommaviy tartibsizliklarga tayyorgarlik ko‘rish aybi qo‘yilgan. Keyinchalik Qodirbek Atambayev va Temirlan Sultanbekovga nisbatan ayblov hokimiyatni zo‘rlik bilan egallashga urinish moddasi bo‘yicha o‘zgartirilgan.

Sud jarayoni 2026-yil iyul oyida boshlangan va yopiq eshiklar ortida o‘tkazilgan. Himoya tomoni sud majlislarini ochiq o‘tkazishni so‘ragan, biroq bu iltimos rad etilgan. Sudlanuvchilar va ularning vakillari tergov tomonidan ilgari surilgan voqealar talqiniga qarshi chiqqan.