“Hammasini berishadi yoki yo‘q bo‘lib ketishadi” — Tramp
AQSh prezidenti Eron Amerika talablarini qabul qilmasa, mamlakat yo‘q qilinishi mumkinligini aytdi.
Donald Tramp Eron mojaroni hal qilish bo‘yicha Amerika shartlarini qabul qilmasa, mamlakat yo‘q qilinishi mumkinligi bilan tahdid qildi. Uning aytishicha, Eron bilan bog‘liq vaziyat tez orada hal bo‘ladi.
Tramp bu haqda Nyu-York shtatining Sirakuz shahrida tarafdorlari oldida nutq so‘zlaganida ma’lum qildi.
“U yoki bu yo‘l bilan: yo ular bizga hamma narsani berishadi, yoki yo‘q bo‘lib ketishadi. Ular buni bilishadi”, — degan AQSh prezidenti.
Avvalroq Tramp AQSh va Eron o‘rtasidagi mojaro yaqin orada hal etilishini bildirgan edi. U, shuningdek, Eronning yadro quroliga ega bo‘lish xavfi bartaraf etilganini ta’kidlagan.
7-oktabr kuni AQSh vitse-prezidenti Jeyms Devid Vens Eron harbiy harakatlarni to‘xtatish uchun uranni boyitish imkoniyatlarini kamaytirishi kerakligini aytgan. Uning qayd etishicha, Vashington Tehron bilan muzokaralar olib bormoqda, biroq muloqot natijasiz yakunlanishi ham mumkin.
9-oktabr kuni Rossiya prezidenti Vladimir Putin va Donald Tramp telefon orqali Eron atrofidagi vaziyatni muhokama qilgan. Putin diplomatik imkoniyatlar hali tugamaganini, Tehron bilan kelishuvga erishish mumkin va zarurligini bildirgan.
Bundan oldin Pentagon Eronga keng ko‘lamli bombardimon uyushtirishga tayyorgarlik ko‘rish bo‘yicha topshiriq bergani haqida xabarlar tarqalgan.
