“Bunday harakatlar zudlik bilan to‘xtatilishi shart”: O‘zbekiston Ar-Riyod aeroportiga qilingan hujumni qat’iy qoraladi
Tashqi ishlar vazirligi tomonlarni keskinlikni kuchaytirmaslikka chaqirdi.
O‘zbekiston Tashqi ishlar vazirligi Ar-Riyod shahridagi Podshoh Xolid nomidagi xalqaro aeroportga husiylar tomonidan uyushtirilgan hujumni qat’iy qoraladi. Bu haqda vazirlikning rasmiy bayonotida ma’lum qilindi.
Vazirlik halok bo‘lganlarning oila a’zolari va yaqinlariga ta’ziya bildirib, jarohatlanganlarga hamdardlik izhor etdi hamda ularning tezroq sog‘ayib ketishini tiladi.
Bayonotda O‘zbekiston Saudiya Arabistoni suvereniteti, hududiy yaxlitligi va xavfsizligini qat’iy qo‘llab-quvvatlashi ta’kidlangan.
Shuningdek, tinch aholi va fuqarolik infratuzilmasi obyektlariga hujumlar xalqaro huquq normalarining jiddiy buzilishi ekani qayd etilgan. Vazirlik bunday hujumlarni to‘xtatishga, barcha tomonlarni vazminlik ko‘rsatishga va keskinlikning yanada kuchayishiga yo‘l qo‘ymaslikka chaqirgan.
O‘zbekiston kelishmovchiliklarni xalqaro huquq normalari va BMT Nizomi tamoyillariga muvofiq, muloqot hamda diplomatik vositalar orqali hal etish tarafdori ekanini bildirgan.
Vazirlik bayonotida O‘zbekiston Saudiya Arabistoni xalqi va hukumati bilan birdamligini izhor etib, mintaqada tinchlik, barqarorlik va xavfsizlikni mustahkamlashga sodiqligini yana bir bor tasdiqlagan.
