Turkiyada avtobus va evakuator to‘qnashdi: 11 kishi halok bo‘ldi
Jarohatlanganlar shifoxonalarga yetkazilgan, hodisa yuzasidan tergov harakatlari boshlangan.
Turkiyaning Manisa viloyati Akhisar tumanida sodir bo‘lgan yo‘l-transport hodisasida 11 kishi halok bo‘ldi, 27 kishi jarohatlandi. Jarohatlanganlar shifoxonalarga yetkazilgan.
Hodisa Gebze–Orhangazi–Izmir avtomagistralining Akhisar to‘lov punktlari yaqinida yuz bergan. Bursa shahridan Izmir tomon harakatlanayotgan sayohat avtobusi evakuator bilan to‘qnashgan.
Manisa gubernatori Vahdettin O‘zkan voqea joyiga borib, vaziyat bilan tanishgan. Uning ma’lum qilishicha, jarohatlanganlardan 16 nafari sariq, 9 nafari yashil va bir nafari qizil toifa bo‘yicha tasniflanib, shifoxonalarga yuborilgan.
Hodisa joyida Favqulodda vaziyatlar boshqarmasi, politsiya, jandarmeriya, o‘t o‘chirish va tez tibbiy yordam xodimlari ishlagan. Ayni paytda Respublika bosh prokuraturasi muvofiqlashtiruvida tekshiruv olib borilmoqda.
Turkiya ichki ishlar vaziri Mustafo Chiftchi ham hodisani tegishli idoralar bilan birgalikda yaqindan kuzatib borayotganini bildirdi. Uning dastlabki ma’lumotida jarohatlanganlar soni 26 nafar deb ko‘rsatilgan.
Turkiya parlamenti raisi Numan Kurtulmush va vitse-prezident Javdat Yilmaz halok bo‘lganlarning yaqinlariga hamdardlik bildirib, jarohatlanganlarga shifo tiladi.
