Aeroportda hushidan ketdi: Turkiyada betob bo‘lib qolgan 19 yoshli yigit vatanga qaytarildi
Uning davolanish xarajatlarining bir qismini u yerdagi vatandoshlar qoplashga yordam berdi.
Turkiyada bo‘lgan vaqtida sog‘lig‘i keskin yomonlashgan 19 yoshli O‘zbekiston fuqarosi vatanga qaytarildi. Bu haqda O‘zbekistonning Istanbuldagi Bosh konsulligi ma’lum qildi.
Qayd etilishicha, yigit Turkiyaga ishlash uchun borgan. Biroq sog‘lig‘i bilan bog‘liq muammolar sabab ishini davom ettira olmagan va O‘zbekistonga qaytishga qaror qilgan.
Samolyot chiptasini xarid qilgach, u Istanbul aeroportiga yetib kelgan, biroq u yerda to‘satdan hushidan ketgan. Shundan so‘ng yigit zudlik bilan Istanbulning Bashakshehir tumanidagi Cham va Sakura shahar kasalxonasiga yotqizilgan. Shifokorlar unga zarur tibbiy yordam ko‘rsatgan.
Shuningdek, Turkiyada yashayotgan va ishlayotgan vatandoshlar yigitning davolanish xarajatlarining bir qismini qoplashga yordam bergan.
Vaziyat O‘zbekistonning Istanbuldagi Bosh konsulligi va Migratsiya agentligi xodimlari tomonidan nazoratga olingan. Ular yigitning vatanga qaytishi bilan bog‘liq tashkiliy va logistika masalalarini hal qilgan.
Ko‘rilgan choralar natijasida 19 yoshli fuqaro O‘zbekistonga eson-omon qaytarilgan.
Bosh konsullik ushbu jarayonda yordam ko‘rsatgan barcha vatandoshlarga minnatdorlik bildirgan
