Sulh bo‘yicha kelishuvga erishilmadi: Eron AQSh javobidan norozi

 

Eron Xavfsizlik kengashi kotibi Mohsen Rizoiy AQShning Hurmuz bo‘g‘ozini ochish va mojaroni tartibga solishga qaratilgan yetti bandli rejaga javobini qoniqarsiz deb baholadi.

 

Uning Press TV telekanaliga aytishicha, AQSh Eron takliflarining ayrimlarini qabul qilgan, biroq qolganlariga javob bermagan.

 

“Biz amerikaliklarga javob bermayapmiz. Ular bizga javob berishdi va biz ularning javobini qoniqarsiz deb bilamiz”, — dedi Rizoiy. Uning ta’kidlashicha, mojaroni imkon qadar tezroq tugatish uchun Vashington Eronning barcha talablarini qabul qilishi lozim.

 

Rizoiy Eron va AQSh o‘rtasida uch bosqichli muzokaralar o‘tkazilganini, biroq ularning har biri AQShning rad javobi bilan yakunlanganini aytdi. Uning fikricha, bu holat Tehronni diplomatiyaga yondashuvini o‘zgartirishga majbur qilgan.

 

Reuters manbalariga tayanib, 23-sentabr kuni Eronning yetti banddan iborat rejasi haqida xabar bergan. Taklif AQShga Qatar, Pokiston va Iroq vositachiligida yetkazilgan.

 

27-sentabr kuni AQSh prezidenti Donald Tramp taklifni rasman rad etib, Hormuz bo‘g‘ozini nazorat qilish masalasida qat’iy pozitsiyasini bildirgan. Eronning talablariga dengiz blokadasini darhol bekor qilish, muzlatilgan aktivlarini qaytarish, neft eksportiga qo‘yilgan sanksiyalarni bekor qilish va barcha jabhalarda harbiy harakatlarni to‘xtatish kiradi.

 

28-sentabr kuni ISNA agentligi Eron tashqi ishlar vaziri Abbos Aragchi boshchiligidagi diplomatlar ayrim masalalarni muhokama qilish uchun Qatar vositachilari bilan uchrashishini xabar qilgan. Reuters ma’lumotiga ko‘ra, Qatar vositachilarining AQSh vakillari bilan ham uchrashishi rejalashtirilgan.