8 ta bank jarimaga tortildi: Markaziy bank qoidabuzarliklarni aniqladi

 

Markaziy bankning Bank nazorati qo‘mitasi 2026-yil sentabr oyida 8 ta yig‘ilish o‘tkazib, jami 37 ta masalani muhokama qildi va ular yuzasidan tegishli qarorlar qabul qildi. Bu haqda regulyator matbuot xizmati xabar berdi.

 

Ko‘rib chiqilgan masalalarning 21 tasi ro‘yxatga olish va ruxsat berish yo‘nalishiga tegishli bo‘ldi. Jumladan, kredit tashkilotlari ustaviga kiritilgan o‘zgartirishlarni ro‘yxatdan o‘tkazish, mikromoliya tashkilotlarini hisob ro‘yxatidan o‘tkazish, akkreditatsiya va to‘lov tashkilotiga litsenziya berish masalalari ko‘rib chiqildi.

 

Shuningdek, kredit tashkilotlarining ustav fondidagi ulushlariga egalik qilish uchun ruxsat berish, tijorat banklari kuzatuv kengashi va boshqaruvi a’zolari hamda muhim ahamiyatga ega xodimlar nomzodlarini ko‘rib chiqish bilan bog‘liq masalalar muhokama qilindi.

 

Qo‘mita kredit va to‘lov tashkilotlarining moliyaviy holatiga oid 16 ta masalani ham ko‘rib chiqdi. Ular orasida Markaziy bank ko‘rsatmalari va prudensial me’yorlar talablariga rioya etilishi, banklar va nobank kredit tashkilotlarida o‘tkazilgan inspeksiya tekshiruvlari natijalari, shuningdek, moliyaviy xizmatlarni “tartibga solish qumdoni” doirasida sinovdan o‘tkazish masalalari bor.

 

Prudensial normativlar va qonunchilik talablariga rioya etilmagani, shuningdek, inspeksiya tekshiruvlarida aniqlangan qoidabuzarliklar sababli 8 ta bankka nisbatan jarima sanksiyalari qo‘llanildi.