Husiylar hujumi Saudiya Arabistonini xavotirga soldi: qirollik Pokistondan yordam so‘radi

 

Saudiya Arabistoni Yamandagi husiy isyonchilarining hujumlari kuchayib borayotgani sababli Pokistondan havo hujumidan mudofaa bo‘yicha yordam so‘radi. Bu haqda The Wall Street Journal (WSJ) nashri manbalarga tayanib xabar berdi.

 

Nashr ma’lumotlariga ko‘ra, qirollik keyingi hujumlarni qaytarish uchun zarur bo‘lgan tutib qoluvchi raketalar yetishmovchiligiga duch kelmoqda. Shu sababli Saudiya Arabistoni mavjud havo mudofaasi batareyalarini qirollik saroylari va energetika infratuzilmasi o‘rtasida qayta taqsimlashga majbur bo‘lgan.

 

Ar-Riyod harbiy ittifoqchisi Pokistondan yordam so‘rash bilan birga, dunyo bo‘ylab havo mudofaasi tizimlarini izlamoqda. Shuningdek, Saudiya Arabistoni Yamandagi ittifoqchilarini qo‘llab-quvvatlash uchun xorijiy jangchilarni yollash imkoniyatini ham ko‘rib chiqmoqda.

 

WSJ qayd etishicha, valiahd shahzoda Muhammad bin Salmonning AQSh bilan yaqin aloqalarni mustahkamlash va mamlakatga katta miqdorda investitsiya kiritish bo‘yicha sa’y-harakatlariga qaramay, Vashington husiylar hujumlariga qarshi harbiy yordam ko‘rsatish borasidagi so‘rovlarga hozircha ehtiyotkorlik bilan yondashmoqda. AQSh Saudiya Arabistoniga harbiy maslahatchilar yuborgan.

 

Hujumlar xavfi valiahd shahzodaning shaxsiy xavfsizlik choralarini ham kuchaytirgan. Nashr manbalariga ko‘ra, 41 yoshli Muhammad bin Salmon kuchli qo‘riqlanadigan, bunkerlar bilan jihozlangan saroylar o‘rtasida harakatlanmoqda va maxsus tanlangan xavfsizlik guruhi tomonidan himoya qilinmoqda.

 

Eslatib o‘tamiz, 10-oktabr kuni Ar-Riyoddagi asosiy aeroportga uyushtirilgan hujum oqibatida 12 kishi halok bo‘lgani va 309 kishi jarohatlangani haqida xabar berilgan. Jabrlanganlar orasida ikki nafar O‘zbekiston fuqarosi ham bo‘lib, ular yengil tan jarohatlari olgan.