Paxta terimida 132 ta qonunbuzilish aniqlandi: 8,8 mlrd so‘mdan ortiq pul undirildi
Davlat mehnat inspeksiyasi paxta yig‘im-terimi mavsumida 145 ta monitoring o‘tkazib, majburiy mehnat, ish haqlarini kechiktirish va mehnat shartnomalarining mavjud emasligi bilan bog‘liq holatlarni qayd etdi.
Davlat mehnat inspeksiyasi tomonidan paxta yig‘im-terimi mavsumida mehnat qonunchiligiga rioya etilishi yuzasidan hududlarda o‘tkazilgan monitoringlar davomida 132 ta qonunbuzilish holati aniqlandi. Bu haqda inspeksiya ma’lum qildi.
Joriy yilning 10-oktyabr holatiga ko‘ra, jami 145 ta monitoring o‘tkazilgan. Aniqlangan qonunbuzilishlarning 3 tasi fuqarolarni majburiy mehnatga jalb etish, 18 tasi mehnat sharoitlari talablariga rioya qilmaslik, 25 tasi terim pullarini o‘z vaqtida bermaslik bilan bog‘liq.
Shuningdek, 86 ta holatda terimchilar bilan mehnat shartnomasi tuzilmagani aniqlangan. Qonunbuzilishlar yuzasidan 46 ta holat bo‘yicha jami 172,8 mln so‘m jarima belgilangan. Shundan 44 ta holatda Ma’muriy javobgarlik to‘g‘risidagi kodeksning 49-moddasi asosida 106,8 mln so‘m, yana 2 ta holatda 51-modda asosida 66 mln so‘m jarima qo‘llanilgan.
Bundan tashqari, mas’ullarga 32 ta yozma ko‘rsatma berilgan. Inspeksiya ma’lumotiga ko‘ra, terimchilarga to‘lanishi kerak bo‘lgan 8 mlrd 870,6 mln so‘m mablag‘ undirib berilgan.
Davlat mehnat inspeksiyasi paxta terimida ishchilarning mehnat huquqlarini himoya qilish, terim pullarining o‘z vaqtida to‘lanishini ta’minlash va majburiy mehnatning oldini olish bo‘yicha monitoringlarni davom ettirishini bildirgan.
