24 soat ichida 104 ta zarba: husiylar Saudiya Arabistonini ayblamoqda
Harbiy qo‘mondonlik vakili hujumlar oqibati tinch aholi halok bo'lganini bildirdi.
Yamandagi husiylar harbiy qo‘mondonligi vakili Yahyo Sari Saudiya Arabistoni so‘nggi 24 soat ichida mamlakat hududlariga 104 ta havo va raketa hujumi uyushtirganini ma’lum qildi. Uning da’vo qilishicha, zarbalar fuqarolik infratuzilmasiga ham tekkan va tinch aholi orasida qurbonlar bor.
Brigada generali Yahyo Sarining ijtimoiy tarmoqlarda yozishicha, hujumlar Yaman poytaxti Sano hamda Dhamar, Taiz, Amron, Lahj, Al-Javf, Marib, Saada va Hodeyda viloyatlarida amalga oshirilgan.
Uning ta’kidlashicha, zarbalarda Xamis Mushayt va Toif aviabazalaridan uchirilgan F-15 va Typhoon samolyotlari, shuningdek, Najron tomondan yo‘llangan raketalardan foydalanilgan.
Sari mojaroning so‘nggi keskinlashuvi boshlanganidan buyon Saudiya Arabistoni tomonidan amalga oshirilgan havo va raketa hujumlarining umumiy soni 2 281 taga yetganini ham bildirgan. Ushbu ma’lumotlar husiylar vakilining bayonotiga asoslangan bo‘lib, keltirilgan raqamlar va qurbonlar haqidagi xabarlar mustaqil manbalar orqali tasdiqlangani ko‘rsatilmagan.
Ayni paytda Saudiya Arabistoni poytaxti Ar-Riyodda ikkita raketa tutib olinganidan keyin ularning parchalari tushishi oqibatida to‘rt kishi jarohatlangan, 15 ta turar joy binosiga yengil moddiy zarar yetgan.
Saudiya Arabistoni fuqarolik mudofaasi xizmati ijtimoiy tarmoqlarda bergan ma’lumotiga ko‘ra, raketa qoldiqlari binolarga shikast yetkazgan va to‘rt kishining jarohatlanishiga sabab bo‘lgan.
