44 mln so‘mga sotilayotgan qalbaki dollarlar: uch kishi ushlandi
Qalbaki pullar Turkiyadan olib kelingani aniqlangan.
Samarqand shahrida 7 400 AQSH dollari miqdoridagi qalbaki banknotlarni sotishga uringan uch nafar fuqaro qo‘lga olindi. Ular qalbaki pullarni 44 million so‘mga sotayotgan vaqtida ushlangan.
Davlat xavfsizlik xizmati, Bojxona va Ichki ishlar organlari xodimlari hamkorligida Samarqand shahrida o‘tkazilgan tezkor tadbirda qalbaki xorijiy valyutani muomalaga kiritishga urinish faoliyati fosh etildi. Xususan, Toyloq tumanida yashovchi, 1996, 2002 va 2003-yillarda tug‘ilgan uch nafar fuqaro qo‘lga olindi.
Aniqlanishicha, ular 100 dollarlik qalbaki banknotlardan iborat jami 7 400 AQSH dollarini shartli xaridorga 44 million so‘mga sotgan vaqtida qo‘lga olingan. Qalbaki kupyuralar Turkiyadan olib kelingani ma’lum bo‘lgan.
Shuningdek, qo‘lga olinganlarning ikki nafari muqaddam sudlangani aniqlangan.
Hozirda holat yuzasidan tergovga qadar tekshiruv harakatlari olib borilmoqda. Qalbaki valyuta savdosiga aloqador boshqa shaxslarni aniqlash choralari ko‘rilmoqda.
