Qurilish litsenziyasi 2–3 kunda berilishi mumkin: oylab kutiladigan jarayon raqamlashtiriladi
Litsenziya olish uchun 30–40 tagacha hujjat taqdim etish talabini bekor qilish taklif etilmoqda.
Qurilish sohasida litsenziya olish yoki uning toifasini oshirish uchun talab etiladigan 30–40 tagacha hujjatni taqdim etish majburiyatini bekor qilish taklif etilmoqda. Yangi tartib joriy etilsa, ilgari 2–3 oygacha vaqt olgan jarayonni onlayn tarzda 2–3 kun ichida amalga oshirish mumkin bo‘ladi.
Bu haqda OAV uchun Kontent tayyorlash markazida o‘tkazilgan brifingda Qurilish va uy-joy kommunal xo‘jaligi vazirligi axborot xizmati rahbari Saidnosir Usmonov ma’lum qildi.
Uning aytishicha, vazirlik tomonidan Hukumatga kiritilgan qaror loyihasida loyiha-qidiruv, qurilish-pudrat va xususiy ekspertiza faoliyati uchun litsenziya olish yoki uning toifasini oshirishda arizaga ko‘plab hujjatlarni ilova qilish talabini bekor qilish nazarda tutilgan.
Zarur ma’lumotlarni tegishli axborot tizimlaridan idoralararo integratsiya orqali avtomatik olish taklif etilmoqda. Bu litsenziyalash jarayonini raqamlashtirish, ortiqcha hujjatbozlikni kamaytirish va inson omilini cheklashga qaratilgan.
Loyiha doirasida arizalarni ko‘rib chiqish muddatlarini 50–60 foizgacha qisqartirish ham ko‘zda tutilgan.
Shuningdek, litsenziya talablariga mos mutaxassislarni izlayotgan tashkilotlar uchun ish qidiruvchilar haqidagi ma’lumotlarni e’lon qilish imkoniyati yaratilishi rejalashtirilmoqda.
