Sud binosidagi janjal: holat yuzasidan jinoyat ishi qo‘zg‘atildi

Toshkent shahar sudi binosida sodir bo‘lgan janjal yuzasidan Jinoyat kodeksining 277-moddasi (bezorilik) bilan jinoyat ishi qo‘zg‘atildi. Hozirda tergov harakatlari olib borilmoqda. Bu haqda Toshkent shahar sudlarining rasmiy bayonotida ma’lum qilindi.

 

Avvalroq aktyor Bilol Isxakov ijtimoiy tarmoqlardagi sahifasi orqali Prezident Shavkat Mirziyoyev va Prezident Administratsiyasi rahbari Saida Mirziyoyevaga murojaat qilgan edi. U sud binosida tug‘ishgan akasi kaltaklanganini aytib, holatga huquqiy baho berish va oilasiga amaliy yordam ko‘rsatishni so‘ragan.

 

Aktyor e’lon qilgan videoda qora kiyimdagi shaxs oq futbolka kiygan erkakka bir necha bor zarba berayotgani aks etgan. Isxakovning aytishicha, voqea vaqtida ichki ishlar xodimi janjalni to‘xtatish o‘rniga tashqariga chiqib ketgan.

 

Murojaatida aktyor Mirzo Ulug‘bek tumani ichki ishlar organlari va tuman prokuraturasi faoliyatidan noroziligini ham bildirgan. Uning ta’kidlashicha, X.Z. va uning sheriklariga oid ish doirasida sud-tibbiy hamda xatshunoslik ekspertizalari xulosalari mavjud bo‘lsa-da, tegishli choralar ko‘rilmayapti. Isxakov tuman prokuraturasi tomonidan uchinchi marta qayta ekspertiza tayinlash masalasi ko‘tarilayotganini ham aytgan.

 

Toshkent shahar sudlarining rasmiy bayonotida esa janjalga aloqador tomonlarning sud binosiga kelishiga sabab bo‘lgan sud jarayoni haqida ma’lumot berilgan.

 

Qayd etilishicha, firibgarlik va bezorilik jinoyatlarida aybdor deb topilgan F. Z.ga oid birinchi instansiya sudi hukmi ustidan sudlanuvchi hamda jabrlanuvchilar Sh. I. va Z. I. apellyatsiya shikoyati bergan.

 

Biroq tomonlar shikoyatlarini qaytarib olgan. Shu sababli Toshkent shahar sudi apellyatsiya-instansiyasining-2026-yil-29-sentyabrdagi ajrimi bilan apellyatsiya instansiyasida ish yuritish tugatilgan.

 

Sud binosidagi janjal yuzasidan qo‘zg‘atilgan jinoyat ishi bo‘yicha esa tergov harakatlari davom etmoqda.