Erta nikohga qarshi jazo kuchaytirildi: jarimalar 50 BHMgacha oshdi
Bolalarni zo‘ravonlikdan himoya qilishga qaratilgan qonun bilan erta nikoh va nikoh tuzish tartibini buzganlik uchun jarimalar oshirildi.
O‘zbekistonda nikoh yoshiga oid qonunchilikni buzganlik uchun ma’muriy jarimalar oshirildi. Bu bolalarni zo‘ravonlikning barcha shakllaridan himoya qilish tizimini takomillashtirishga qaratilgan qonunda belgilangan.
Qonunchilikdagi o‘zgartishlarga ko‘ra, nikoh yoshiga yetmagan shaxs bilan amalda nikoh munosabatlariga kirish uchun jarima miqdori 5–10 BHMdan 10–15 BHMgacha oshirildi.
Shuningdek, nikoh yoshiga yetmagan shaxsni turmushga berish yoki uylantirish uchun ota-onalar yoxud ularning o‘rnini bosuvchi shaxslarga 20–25 BHM miqdorida jarima belgilandi. Ilgari bu miqdor 7–15 BHMni tashkil etgan.
Bundan tashqari, nikohi belgilangan tartibda ro‘yxatdan o‘tkazilmagan shaxslar o‘rtasida, shu jumladan nikoh yoshiga yetmagan shaxs bilan nikoh tuzish maqsadida diniy marosim o‘tkazganlik uchun jarima 15–30 BHMdan 30–50 BHMgacha oshirildi.
O‘zgarishlar nikoh yoshiga oid qonunchilikka rioya etilishini ta’minlash va voyaga yetmaganlarning huquqlarini himoya qilishga qaratilgan.
