Farzand tarbiyasidagi mas’uliyatsizlik: ota-onalarni qanday jazo kutmoqda?

 

O‘zbekistonda bolalarni tarbiyalash va ularga g‘amxo‘rlik qilish majburiyatlarini bajarmaganlik uchun ma’muriy javobgarlik kuchaytirildi. Bu bolalarni zo‘ravonlikning barcha shakllaridan himoya qilish tizimini takomillashtirishga qaratilgan qonunda belgilangan.

 

Qonunga ko‘ra, ota-onalar yoki ularning o‘rnini bosuvchi shaxslar voyaga yetmagan bolalarni tarbiyalash majburiyatlarini bajarmasa, jumladan, ularning ma’muriy huquqbuzarlik sodir etishiga sabab bo‘lsa, javobgarlikka tortilishi mumkin.

 

Shuningdek, zarur imkoniyatlarga ega bo‘lgan ota-onalar bolaning asosiy ehtiyojlarini qasddan qondirmasligi oqibatida uning sog‘lig‘i, jismoniy, aqliy yoki axloqiy rivojlanishiga zarar yetsa ham javobgarlik belgilanadi.

 

Mazkur huquqbuzarlik uchun jarima bazaviy hisoblash miqdorining 5 baravaridan 10 baravarigacha etib belgilandi. Kodeksning 47-moddasidagi boshqa huquqbuzarliklar uchun ham jarimalar oshirildi: ota-onalar yoki vasiylar tomonidan majburiy umumiy o'rta, o'rta maxsus yoki kasb-hunar ta'limini tugatishga to'sqinlik qilish 15 dan 20 BRV gacha jarima solishga sabab bo'ladi. Takrorlangan huquqbuzarlik 20 dan 30 BRV gacha jarima yoki ayrim holatlarda 15 sutkagacha ma’muriy qamoq jazosi ham qo‘llanishi mumkin. Voyaga yetmaganlarni qarovsiz qoldirish uchun 5 dan 10 BRV gacha jarima solinadi.

 

Qonun bolalarning huquq va manfaatlarini himoya qilish hamda ota-onalarning mas’uliyatini oshirishga qaratilgan.