Husiylar Yamandagi prezident saroyi majmuasiga raketa zarbalari berdi: ikki kishi halok bo‘ldi
Hujum vaqtida majmuada bo‘lgan hukumat a’zolari jabrlanmagan.
Yamanning janubidagi Adan shahrida joylashgan prezident saroyi majmuasiga uyushtirilgan hujum oqibatida ikki nafar xavfsizlik xodimi halok bo‘ldi. Hujum vaqtida majmuada bo‘lgan bosh vazir va hukumat a’zolari jabrlanmagan.
Reuters agentligiga ikki hukumat rasmiysi xabar berishicha, husiylar payshanba kuni Maashiq prezident saroyi majmuasiga raketa zarbalari bergan. Yaman axborot vaziri Moammar al-Eryaniyning aytishicha, majmuaga jami beshta raketa uchirilgan.
Husiylar nazoratidagi SABA axborot agentligi harbiy rasmiysiga tayanib, hujum Saudiya Arabistoni harbiylari boshqaruvidagi operatsiyalar shtab-kvartirasi va qurol-yarog‘ omborlariga qaratilganini ma’lum qilgan. Reuters bu ma’lumotlarni mustaqil ravishda tasdiqlay olmagan.
Guruhning harbiy vakili Yahyo Sariy zarbani Saudiya Arabistonining harbiy kuchlari to‘planadigan joylarni nishonga olish siyosatining bir qismi sifatida izohlagan.
Avvalroq uch nafar guvoh saroy yaqinida kuchli portlash ovozlarini eshitganini Reuters agentligiga bildirgan.
