O‘zbekistonda biznesni ro‘yxatga olish boshlanadi: jarayon 30-noyabrgacha davom etadi
Respondentlar haqidagi ma’lumotlar sir saqlanib, faqat statistik maqsadlarda ishlatiladi.
Hukumatning 2026-yil 9-oktyabrdagi 557-son qarori bilan O‘zbekistonda biznesni ro‘yxatga olishni o‘tkazish chora-tadbirlari tasdiqlandi.
Qarorga ko‘ra, ro‘yxatga olish 15-oktyabrdan 30-noyabrgacha amalga oshiriladi. Ro‘yxatga olishning hisob sanasi esa 2026-yil 1-oktabr, soat 00:00 etib belgilangan.
Jarayonda yuridik shaxslar, yakka tartibdagi tadbirkorlar, dehqon xo‘jaliklari, o‘zini o‘zi band qilgan jismoniy shaxslar, shuningdek, davlat ro‘yxatidan o‘tmasdan faoliyat yuritayotgan subyektlar ham qamrab olinadi.
Yuridik shaxslar hisobot.stat.uz sayti orqali, o‘zini o‘zi band qilgan fuqarolar esa census.stat.uz platformasi orqali mustaqil ro‘yxatdan o‘tadi. Ro‘yxatga oluvchi xodimlar iqtisodiy birliklarni ularning faoliyat yuritayotgan manzilida ham ro‘yxatga oladi. So‘rovlar soat 09:00 dan 18:00 gacha o‘tkaziladi.
Qarorda respondentlar haqidagi ma’lumotlarning maxfiyligi ham belgilangan. Ushbu ma’lumotlardan faqat statistik maqsadlarda foydalaniladi.
Ro‘yxatga olish bilan bog‘liq savol va murojaatlar uchun 1851 qisqa raqamli koll-markaz tashkil etiladi.
Ro‘yxatga olish yakunlari Milliy statistika qo‘mitasining rasmiy saytida 2027-yil 1-sentabrgacha e’lon qilinadi. Jarayon tugaganidan keyin 10 kun davomida ro‘yxatga olingan iqtisodiy birliklarning 5 foizigacha qismi tanlanma nazorat tartibida tekshiriladi.
