Ikki yillik dastur: Chekka hududlardagi maktablarga yosh mutaxassislar yuboriladi
Mutaxassislar maktablarda ishlash bilan birga pedagogik va liderlik bo‘yicha treninglardan o‘tadi.
“Teach for Uzbekistan” (TFU) va Toshkent davlat sharqshunoslik universiteti (TDSHU) o‘rtasida hamkorlik memorandumi imzolandi. Kelishuv chekka hududlardagi maktablarda xorijiy tillar, jumladan, sharq tillarini o‘qitish sifatini oshirish va o‘quvchilar uchun ta’lim imkoniyatlarini kengaytirishga qaratilgan.
Memorandumga ko‘ra, universitetning iqtidorli bitiruvchilari ikki yillik pedagogik va liderlik dasturi — Fellowship doirasida olis va chekka hududlardagi maktablarga jalb etiladi. Ular maktablarda to‘liq stavkada dars berish bilan birga, pedagogik mahorat va boshqaruv ko‘nikmalarini rivojlantirishga qaratilgan intensiv treninglarda ishtirok etadi.
Dastur qatnashchilariga ish haqidan tashqari qo‘shimcha moliyaviy va metodik ko‘mak ham ko‘rsatiladi. Fellowship dasturini tamomlagan mutaxassislar 60 dan ortiq mamlakatni birlashtirgan “Teach For All” xalqaro tarmog‘i bitiruvchilari maqomiga ega bo‘ladi.
Hamkorlik doirasida chekka hududlardagi maktab o‘quvchilarining bilim darajasini oshirish, xorijiy tillarni o‘rganish imkoniyatlarini kengaytirish, shuningdek, til klublari va ijtimoiy loyihalarni rivojlantirish ko‘zda tutilgan.
