Maktabdagi qizlar janjali: direktor o‘rinbosariga hayfsan berildi
Shuningdek, sinf rahbarlariga qat’iy ogohlantirish bildirilgan.
Samarqand tumani 49-sonli umumiy o‘rta ta’lim maktabida o‘quvchi qizlar o‘rtasida janjal yuz bergani haqida tarqalgan xabar yuzasidan rasmiy munosabat bildirildi.
Samarqand viloyati Maktabgacha va maktab ta’limi boshqarmasi axborot xizmatiga ko‘ra, hodisa 2026-yil 12-oktyabr kuni sodir bo‘lgan. Holat tegishli tashkilotlar mas’ullari ishtirokida atroflicha o‘rganilgan.
O‘rganish davomida maktab ma’muriyati va mas’ul pedagoglar tomonidan kamchiliklarga yo‘l qo‘yilgani aniqlangan. Shu munosabat bilan maktab direktorining ma’naviy-ma’rifiy ishlar bo‘yicha o‘rinbosariga hayfsan intizomiy jazosi berilgan, sinf rahbarlariga esa qat’iy ogohlantirish bildirilgan.
Shuningdek, janjalda ishtirok etgan o‘quvchilarning ota-onalariga nisbatan qonunchilikka muvofiq ma’muriy choralar ko‘rilgan.
