“Do‘zax sanksiyalari”: Tramp Rossiyaga qarshi yangi cheklovlarni bekor qildi
AQSh prezidenti Rossiya nefti va gazini xarid qiluvchi ayrim davlatlarga tariflar joriy etish choralarini ham to‘xtatdi.
Donald Tramp Rossiyaga qarshi yangi keng ko‘lamli sanksiyalarni joriy etish to‘g‘risidagi farmonni imzoladi, biroq ularni darhol to‘xtatib qo‘ydi. Qonun yangi cheklovlarni 18-oktabrgacha joriy etishni nazarda tutgan edi.
BBC ma’lumotiga ko‘ra, Rossiyaning 2022-yilda Ukrainaga bostirib kirishidan keyin AQSh tomonidan kiritilgan ko‘plab sanksiyalar prezidentning ijro farmonlariga asoslangan. Shu sababli Tramp ularni bekor qilish yoki yumshatish imkoniyatiga ega bo‘lgan.
Yangi qonun avvalgi cheklovlarni qonunchilikda mustahkamlash bilan birga, Rossiyaga qarshi qo‘shimcha sanksiyalar joriy etishni ham nazarda tutadi. Shuningdek, prezidentga AQSh milliy manfaatlaridan kelib chiqib, ushbu choralarni to‘xtatib turish vakolati berilgan.
Tramp qonunda belgilangan muddat tugashidan oldingi oxirgi ish kuni farmon chiqargan. U hujjatda ko‘zda tutilgan sanksiyalar, cheklovlar va tariflarni to‘xtatib turishini bildirgan hamda bunday qaror AQSh milliy manfaatlariga mos kelishini Kongressga ma’lum qilgan.
Bu Trampning Rossiyaga qarshi cheklovlarni yumshatishga qaratilgan ilk qarori emas. BBC qayd etishicha, prezident bundan avval ham energiya narxlarining oshishi va amerikalik iste’molchilar manfaatlarini sabab qilib, Rossiya neft mahsulotlariga oid ayrim cheklovlarni yumshatgan.
Xalqaro energetika agentligi esa Yaqin Sharqdagi urush va energetika bozoridagi beqarorlik sabab neft ta’minotidagi muammolar 2027-yil bahorigacha davom etishi mumkinligidan ogohlantirgan. Energiya narxlarining yuqoriligi Rossiya neftiga qarshi cheklovlar masalasida AQSh ma’muriyatining qarorlariga ta’sir qilishi mumkin.
Qaror 2026-yil 16-oktabrda imzolangan farmonda mustahkamlangan. Unga ko‘ra, qonunda nazarda tutilgan bir qator sanksiyalar va tariflar AQSh milliy manfaatlari asosida to‘xtatib turiladi. Farmonning amal qilish muddati prezident yoki vakolatli mansabdorlar keyingi choralarni zarur deb topguniga qadar davom etadi.
